ShQO-da órtten kóz jumǵandar sany 7%-ǵa azaıdy

ÓSKEMEN. KAZINFORM – Shyǵys Qazaqstan oblysynda bıylǵy jylytý maýsymynda órtten qaza bolǵandar sany 7%-ǵa azaıdy. 

ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar jer úılerdegi órttiń aldyn alý úshin reıdterge shyǵýda. Oblysta áleýmettik turǵyda osal otbasylar pesh jaǵyp otyrǵan 3 101 úı bar. Bul úıler tolyqtaı tekserildi. 

- TJD qyzmetkerleri, jergilikti atqarýshy organdar men polıtseılerden quralǵan komıssııalyq tekserýler eki ret júrgizildi. Alǵashqy aralaý barysynda órt qaýipsizdigi talaptaryn buzǵan 1 379 úı anyqtaldy. Negizinen, buzýshylyqtar peshke qatysty boldy. Profılaktıkalyq jumystardyń nátıjesinde qaıtalama tekserýler barysynda 234 úıdegi buzýshylyqtar joıyldy. Ár úı ıesine órt qaýipsizdigi talaptaryn saqtaý boıynsha nusqaýlyq berildi, - delingen aqparatta. 

Aıta keteıik, bıyl óńir boıynsha órtten qaza bolǵandar sany 7%-ǵa, ıis tıgender sany 47%-ǵa azaıdy. 

Eske salsaq, osyǵan deıin ShQO-da bir kúnde 70-ten astam kólik qar qursaýynda qalǵany habarlanǵan.