ShQO-da órtengen úıden 58 jastaǵy er adamnyń denesi tabyldy

Shyǵys Qazaqstan oblysy Altaı aýdanynda jer úı órtenip, bir adam kóz jumdy, dep habarlaıdy Kazinform.

ShQO Tótenshe jaǵdaılar departamenti baspasóz qyzmetiniń málimetine súıensek, 30 qarashada tańerteń Altaı qalasyndaǵy Abaı kóshesinde jeke turǵyn úı órtengen. 

«Oqıǵa ornyna órt sóndirýshiler shuǵyl kelip jetti. Sol kezde úıdegi bólmelerdiń biriniń qabyrǵasy jáne aǵash eden janyp jatqan. Tútin tumshalaǵan úıdi barlaý kezinde qutqarýshylar 58 jastaǵy úı ıesiniń denesin tapty», - delingen aqparatta.

Kóp uzamaı jalpy aýdany 6 sharshy metr aýmaqty quraǵan qyzyl jalyn tolyqtaı sóndirildi. Órtpen kúreske jeke quramnan 7 adam jáne 2 órt sóndirý tehnıkasy jumyldyrylǵan. 

Tilsiz jaýdyń shyǵýyna - otty abaısyz qoldaný sebep bolýy múmkin.