ShQO-da naýqasty durys emdemegen dáriger sottaldy

ÓSKEMEN. KAZINFORM – Shyǵys Qazaqstan oblysy Úlken Naryn aýdanynda dáriger moraldyq zalal retinde patsıentine 3 mln teńge berýge mindetteldi.

ShQO soty baspasóz qyzmetiniń málimetine, Úlken Naryn aýdandyq sotynda QR Qylmystyq Kodeksiniń 317-baby (Medıtsına qyzmetkeriniń kásibı mindetterin tıisinshe oryndamaýynyń abaısyzda patsıenttiń densaýlyǵyna aýyr zııan keltirýi) boıynsha is qaraldy.

Belgili bolǵandaı, ıyǵy aýyrsynǵan áıel adam aýdandyq aýrýhanaǵa júgingen. Dáriger oǵan «ıyq býynynyń artrozy» dıagnozyn qoıyp, novokaındi blokada egý emin taǵaıyndaǵan.

Birneshe ekpeden keıin naýqastyń jaǵdaıy kúrt nasharlap, keýde tusynda aýyrsyný, entigý, tynys alýdyń qıyndaýy baıqaldy. Dáriger áýeli «allergııalyq esekjem» dep dıagnoz qoıyp, keıin «ózge pnevmotoraks» dep anyqtap, qabyrǵaaralyq drenaj ornatqan.

- Alaıda bul áreket medıtsınalyq turǵyda durys jasalmaǵan. Sonymen qatar dáriger medıtsınalyq qujattamany rásimdemeı, patsıentti statsıonarǵa jibermegen. Sodan soń naýqas Altaı aýdandyq ortalyq aýrýhanasyna júginip, oǵan «massıvti sol jaqtyq travmalyq pnevmotoraks» dıagnozy qoıylǵan. Áıel shuǵyl túrde aýrýhanaǵa jatqyzylǵan, - delingen aqparatta.

Sot-medıtsınalyq saraptama qorytyndysy boıynsha, patsıenttiń densaýlyǵyna aýyr zııan kelgeni anyqtaldy. Sot barysynda jábirlenýshi dárigerden moraldyq zalal retinde 10 mln teńge óndirýdi surady.

- Sot bul somany 3 mln teńgege deıin azaıtyp, dárigerdi bir jyl merzimge bas bostandyǵyn shekteý jazasyna kesti. Alaıda «QR Konstıtýtsııasynyń otyz jyldyǵyna baılanysty amnıstııa týraly» zańǵa sáıkes, sottalýshy taǵaıyndalǵan jazadan bosatyldy. Úkim áli zańdy kúshine engen joq, - delingen habarlamada.

Eske salsaq, osyǵan deıin Óskemende hokkeıshi ólimine qatysty sot úkimi shyqqany habarlanǵan.