ShQO-da máslıhattarǵa 174 depýtat saılanady

ÓSKEMEN. QazAqparat – Shyǵys Qazaqstan oblysynda túrli deńgeıdegi máslıhattarǵa 174 depýtat saılanady. Bul týraly Shyǵys Qazaqstan oblystyq saılaý komıssııasynyń tóraǵasy Ersaıyn Nábıev aıtty, dep habarlaıdy QazAqparat tilshisi.

«Qazirgi ýaqytta QR Parlamenti Májilisine, máslıhattar depýtattyǵyna kandıdattar usynylýda. Ol 8 aqpan kúni saǵat 18.00 aıaqtalady. Shyǵys Qazaqstan oblysynan Parlament Májilisine – 1 depýtat, oblystyq máslıhatqa – 32 (16 – birmandattyq, 16 – partııalyq tizim boıynsha), qalalyq jáne aýdandyq máslıhattarǵa – 142 (barlyǵy birmandattyq) saılanady», - dedi ol.

Ersaıyn Nábıevtiń aıtýynsha, depýtattyqqa kandıdat retinde usynylǵandar boıynsha tıisti memlekettik organdarǵa suraý salý jumystary júrgizilip jatyr.

Atalǵan organdardan sáıkestikti anyqtaý boıynsha tıisti jaýap alynǵannan keıin kandıdattardy tirkeý protsedýrasy bastalady.

Eske salsaq, osyǵan deıin qazaqstandyqtardyń jartysynan kóbi Májilis saılaýyna barýǵa nıetti ekendigin habarlaǵan bolatynbyz.