ShQO-da Máńgilik alaýǵa taýyq qýyrǵan er adam qamaýǵa alyndy

ÓSKEMEN. KAZINFORM — Shyǵys Qazaqstan oblysyndaǵy Rıdder qalasynda Máńgilik alaýda taýyq qýyrǵan er adam 10 táýlikke ákimshilik qamaqqa alyndy.

ShQO soty baspasóz qyzmetiniń málimetine súıensek, er adamǵa eki bap boıynsha aıyp taǵylǵan. 

Birinshi ol túngi ýaqytta Ekinshi dúnıejúzilik soǵystan oralmaǵan jaýyngerlerdiń aty-jónderi qashalyp jazylǵan Máńgilik alaýda taýyq qýyryp, memorıal aýmaǵyn lastap ketken. Sóıtip, tarıhı-mádenı eskertkishti qorlaǵan.

Odan keıin kópqabatty turǵyn úıdiń podezinde mas kúıde qatty aıqaılap, boqtyq sózder aıtqan. Esikterdi qaǵyp, eldiń mazasyn qashyryp, qoǵamdyq tártipti buzǵan.

— Sot qaýlysymen er adam eki bap boıynsha kináli dep tanyldy. Oǵan 10 táýlik ákimshilik qamaqqa alý jazasy taǵaıyndaldy, — delingen aqparatta.

Eske salsaq, osyǵan deıin ShQO-da Máńgilik alaýǵa taýyq qýyrǵandar izdestirilip jatqany habarlanǵan.