ShQO-da qys kezindegi apattyq-qutqarý jumysyna 400-ge jýyq tehnıka ázirlendi

ÓSKEMEN. QazAqparat – Shyǵys Qazaqstan oblysynda qys kezinde apattyq-qutqarý jumystaryn júrgizý úshin 400-ge jýyq tehnıka ázirlendi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńir qutqarýshylary qys mezgiline daıyndalyp jatyr.

Qysta bolatyn túrli tótenshe jaǵdaılarǵa jedel den qoıý úshin 1525 adam men 382 tehnıka saqadaı saı.

«104 jol talǵamaıtyn tehnıka ázirlendi. Onyń ishinde «Trekol», «Sherp», «Vahta» kólikteri bar. «Trekol» kóligi júre almaıtyn jer joq. Alty dońǵalaqty kólik tereń qarda, muzda, batpaqta da qozǵala alady. Budan bólek, qutqarýshylarǵa arnaıy daıyndalǵan ıtter kómektesedi. Itter profılaktıkalyq jarylys jumystaryn júrgizýde, zardap shekkenderdi izdegen jaǵdaıda, qar kóshkinin túsirý kezinde kezekshilik etedi», - delingen aqparatta.

Osy rette qutqarýshylar turǵyndarǵa kóligi qar qursaýynda qalǵanda ne isteý kerektigi týraly keńes berdi.

«Birinshiden, ózińizdiń ornalasqan jerińizdi (mobıldi qurylǵylardy paıdalaný nemese jol belgilerin qaraý) anyqtaýyńyz kerek. Sodan keıin «112» nómiri boıynsha qutqarý qyzmetine habarlasyp, kómek surańyz. Qysta alys jolǵa shyqqanda janarmaı bagyn meılinshe toltyryp alýǵa tyrysyńyz. Sebebi kólik otalyp turǵanda ishi jyly bolady. Qutqarýshylar kelip jetkenshe barlyq jyly zattardy kıip alyńyz», - delingen málimette.