ShQO-da Qurban aıt meıramy atalyp ótti
«Qurban aıt elimizdegi barsha ulttar men ulystardy birlik pen yntymaqqa úndep, tatýlyq pen beıbitshiliktiń merekesine aınaldy. Ol – ózara izgilik pen meıirimdilik sııaqty adamı qundylyqtardy dáripteıtin qasıetti meıram. Bul kúnderi ár musylman týǵan-týystary men baýyryna qamqorlyq kórsetip, muqtaj jandarǵa qol ushyn sozyp, óziniń rýhanı kemeldenýine erekshe mán beredi. Qasıetti merekede barshańyzǵa zor densaýlyq, otbasylaryńyzǵa amandyq, baq-bereke tileımin, – dedi aımaq basshysy áleýmettik jelidegi paraqshasynda.
Koronavırýs indetine baılanysty meıram onlaın formatta ótti. Qazaqstan musylmandary dinı basqarmasy qurbandyqty onlaın shalý úshin Qurban2020.kz saıtyn iske qosty. Oblystaǵy arnaıy alańdarda saıt arqyly qurbandyqqa tapsyrys berýshilerdiń maldary tańertennen beri soıylýda.
Qurbandyq shalý rásimi foto men vıdeoǵa túsirilip, tapsyrys berýshilerge esep beriledi. Bul oryndarda barlyq sanıtarlyq-epıdemıologııalyq talaptar saqtalady. Bas memlekettik sanıtarlyq dárigerdiń Qurban aıtqa baılanysty qabyldaǵan qaýlysyna sáıkes, taýarlar men kórsetiletin qyzmetter sapasyn baqylaý departamentiniń ókilderi men polıtsııa qyzmetkerleri bazarlar men avtokólikterdi baqylaýda ustap otyr.
«Halıfa Altaı» ShQO meshitiniń naıb ımamy Qanat Daýlbaev, qurbandyqqa shalynatyn maldy qandaı krıterııler boıynsha tańdaý kerektigin aıtyp berdi.
«Qurban aıt meıramynda maldyń tórt túrin qurbandyqqa shalýǵa bolady. Máselen jastan asqan qoıdy soıýǵa ruqsat etiledi. Sondaı-aq eki jasqa tolǵan iri qara men bes jastaǵy túıeni qurbandyqqa shalýǵa bolady, - dedi Qanat Daýlbaev.
Mysaly, Óskemen óńiri boıynsha qazirgi sátte qurbandyq shalýǵa 50 tapsyrys túsken. Budan bólek 200-den astam muqtaj otbasylar ótinish qaldyrǵan. Qasıetti kúni volonterler muqtaj jandarǵa qurbandyqqa shalynǵan maldyń etin jetkizip berýde. Al Semeı óńiri boıynsha 106 qoı men 10 iri qara mal qurbandyq shalynyp, taratyldy.
Aıta keteıik, Shyǵys Qazaqstan oblysy boıynsha qurbandyq shalýǵa 672 adam ótinish bildirgen. Onyń ishinde 438-in volonterler taratyp berdi.
QMDB-nyń ShQO, Óskemen óńiri boıynsha bas ımamy Ermek qajy Muhataı shyǵysqazaqstandyqtardy meırammen quttyqtap, óńir turǵyndaryn adam kóp jerde jınalmaýǵa shaqyrdy.
«Barlyq qazaqstandyqtarǵa jaqsylyq pen amandyq tileımin. Táńirim, shalǵan qurbandaryńyzben duǵalaryńyzdy qabyl etsin. Bıyl Qurban aıt karantın jaǵdaıynda ótýde. Alaıda bul bizge jaqsylyq jasaýǵa kedergi keltirmeıdi. Merekelik duǵa jasalmasa da, bizdiń azamattar onlaın rejımde qurbandyq shala alady. Karantın talaptaryn saqtap, úıde otyryńyzdar, - dedi Ermek qajy Muhataı.
