ShQO-da kóshkinniń aldyn alý úshin qar túsirildi

ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirildi, dep habarlaıdy QazAqparat tilshisi.

ShQO Tótenshe jaǵdaılar departamentiniń málimetine súıensek, óńirde aýa raıy jylytyp, jel soǵýyna oraı taýly jerlerde qar kóshkini júrý qaýpi artyp otyr. Sondyqtan búgin «Óskemen-Altaı» tasjolynda jasandy jolmen qar kóshkinin túsirý jumystary júrgizildi.

«Qazseldenqorǵaý» ShQ fılıalynyń mamandary men qutqarýshylar taý baýraıynda 5 ret jarylys jasady. Túsken qardyń jalpy kólemi 6800 tekshe metrdi qurady. Kóshkin joldy tolyqtaı jaýyp tastady. «QazAvtoJol» kompanııasynyń qyzmetkerleri joldy tazalap, kólik qozǵalysyn qamtamasyz etti», - delingen aqparatta.

Osy rette, ShQO TJD qyzmetkerleri óńir jurtshylyǵyna taýly jerlerge barmaý qajettigin eskertedi.