ShQO-da kópbalaly otbasylarǵa 256 mln teńge grant berildi

ÓSKEMEN. QazAqparat – Shyǵys Qazaqstan oblysynda «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda bólinetin granttardyń 50%-y kópbalaly jáne az qamtylǵan otbasylarǵa berilmek, dep habarlaıdy QazAqparat tilshisi.

Bul jaıly kópbalaly otbasylar máseleleri jónindegi komıssııa otyrysynda aıtyldy. Óńirde «Eńbek» baǵdarlamasy boıynsha 676 mln teńge somasynda 1214 grant berilse, onyń ishinde kópbalaly otbasylarǵa 256,7 mln teńge mólsherinde 462 grant bólingen.

«Qalalar men aýdandardyń ákimdikteri jergilikti komıssııalarmen birlesip, az qamtylǵan jáne kópbalaly otbasylarǵa memlekettik granttar berý boıynsha aýqymdy jumys atqarýy tıis. Bul óte mańyzdy. Qazir biz bul kórsetkishti 30%-ǵa jetkizdik. Biraq meniń oıymsha, kelesi jylǵa berilgen granttar úlesi 50%-dan kem bolmaýy tıis», - dep atap ótti Danıal Ahmetov.

ShQO Jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Aınur Sultanovanyń aıtýynsha, kópbalaly jáne az qamtylǵan otbasylar nesıe boıynsha qaryzdaryna qaramastan grant ala alady.

Atqarýshylyq is júrgizý týraly zań sheńberinde sot oryndaýshylary, sondaı-aq banktik qyzmetke sáıkes ekinshi deńgeıdegi bankter memlekettik járdemaqylar esep-shottarynan basqa, boryshkerlerdiń shottaryn buǵattap tastaýy múmkin. Osyǵan baılanysty, Jumyspen qamtý jáne áleýmettik baǵdarlamalardy úılestirý basqarmasy men «Qazpochta» AQ fılıaly memlekettik granttar men qarajatty áleýmettik kartalyq shottarǵa – ID kartalarǵa aýdarý týraly kelisimge qol jetkizdi.

«Kópbalaly jáne az qamtylǵan otbasylar jumyspen qamtý ortalyqtaryna júgingen kezde, olarǵa Qazpochtada shot ashý usynylady. Otbasyna grant alýǵa rastaý kelip túskennen keıin, jumyspen qamtý ortalyǵy qarajatty normatıvtik qujattar sheńberinde buǵattaýǵa jatpaıtyn shotqa jiberedi. Budan basqa, Jumyspen qamtý jáne áleýmettik baǵdarlamalardy úılestirý basqarmasy Ádilet basqarmasymen birlesip kópbalaly jáne az qamtylǵan otbasylardan túsken ótinishterdi qaraý jáne týyndaǵan barlyq máselelerdi jedel sheshý úshin memorandým jasasty. Sonymen qatar keńes berý jáne saraptamalyq kómek kórsetý úshin Óskemen men Semeı qalalarynda «Januıa« ortalyqtary quryldy», – dedi Aınur Sultanova..

Esterińizge sala ketsek, osyǵan deıin ShQO-da jyl sońyna deıin kópbalaly otbasylarǵa 665 páter beriletindigi habarlanǵan bolatyn.