ShQO-da keı aýdan paıdalanylmaı jatqan jerlerdi qaıtarýǵa asyǵar emes

ÓSKEMEN. KAZINFORM — Shyǵys Qazaqstan oblysynda bos jatqan jaıylym men egistik jerlerdi paıdalanýdy baqylaý kúsheıtilip jatyr.

ShQO Jer qatynastary basqarmasyna osy jyldyń 24 shildesinen beri jalpy kólemi 56,6 myń gektar jer boıynsha materıaldar kelip túsken. Onyń 53,8 myń gektary jaıylym, 2,8 myń gektary egistik jerlerge qatysty. 

— Bul baǵytta Altaı, Zaısan, Katonqaraǵaı, Kúrshim, Tarbaǵataı, Ulan, Úlken Naryn jáne Shemonaıha aýdandary belsendi jumys júrgizip keledi. 2024 jyldan bastap zańnamaǵa engizilgen ózgeristerge sáıkes, jaıylymdyq jerler turǵyndarǵa tikeleı berilmeıdi. Jaıylymdardy paıdalaný tek jaıylymdardy basqarý josparyna saı júrgizilýi tıis, — deıdi basqarma basshysy Nadejda Mıheılıs.

Bıyl memleket menshigine 120 myń gektar jer qaıtarylady dep josparlanǵan. Búginde bul jospardyń 67%-y (80,3 myń gektar) oryndaldy. 

Dese de keı aýdanda bul jumys sylbyr júrgizilgen. Máselen, Samar aýdanynda — nebári 10% (1,4 myń gektar), Marqakól aýdanynda — 33% (4 myń gektar) jer tárkilengen.

Eske salsaq, osyǵan deıin ShQO-da jer qoınaýyn zańsyz paıdalaný isi áshkerelengeni habarlanǵan.