ShQO-da keneden zardap shekkender sany 80-ge jýyqtady

ÓSKEMEN. KAZINFORM – Shyǵys Qazaqstan oblysynda kene shaqqandar sany kún sanap kóbeıip jatyr. 

Óńir boıynsha bıyl qardyń tez erýine baılanysty keneler ádettegiden erte shyqty. Barlyǵy 76 adam qaýipti zııankesten zardap shekken. Onyń ishindegi 21 paıyzy — 14 jasqa deıingi balalar.

— Aýrýdyń aldyn alý maqsatynda kene entsefalıtine qarsy ımmýnoglobýlındi kene shaǵýdan zardap shekkenderdiń 95%-y aldy. 5%-y medıtsınalyq kómekke kesh júginý jáne keneniń endemııalyq aýmaqqa jatpaıtyn eldi mekende júrgende shaǵýyna baılanysty seroprofılaktıkamen qamtylmady, - dep habarlady ShQO Sanıtarlyq-epıdemıologııalyq baqylaý departamentinen. 

Oblys aýmaǵynda keneniń juqpaly aýrýlarymen aýyrǵan naýqastar tirkelgen joq. Kópjylǵy epıdemıologııalyq taldaýdyń nátıjesi boıynsha alǵashqy syrqattanýshylar negizinen mamyr aıynan bastap anyqtalady. 

— Qazirgi ýaqytta endemııalyq aýmaqtardyń medıtsınalyq uıymdarynda kene entsefalıtine qarsy ımmýnoglobýlın preparatynyń qory jetkilikti mólsherde. Kene entsefalıtiniń tabıǵı oshaqtarynyń qataryna Óskemen, Rıdder qalalary men Glýbokoe, Zaısan, Altaı, Katonqaraǵaı, Samar, Ulan, Shemonaıha aýdandary jatady, - delingen aqparatta.

Eske salsaq, osyǵan deıin kene entsefalıtinen qalaı saqtanýǵa bolatyny jaıly jazǵanbyz.