ShQO-da kelesi jylytý maýsymyna daıyndyq bastalyp ketti
Bıylǵy kúzgi-qysqy jylytý maýsymy ádettegideı ótti. 10 iri jylý kózi jáne 558 qazandyq mekemeler men turǵyn úılerdi jylýmen qamtamasyz etti. Bul jaıly ShQO Energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Nurlan Ramazanov onlaın formatta ótken baspasóz máslıhatynda málimdedi. Kelesi aptanyń sońynda Shyǵys Qazaqstannyń barlyq qalalary men aýdandarynda jylytý maýsymy aıaqtalmaq.
«Aldaǵy jylytý maýsymyna daıyndyq úshin 59 qazandyqty, 14 týrboagregatty jáne 27 gıdroagregatty jóndeý qajet. Bul jumystar «Óskemen JEO«, «Sogra JEO«, «Rıdder JEO«, Semeıdegi «Teplokommýnenergo«, «Óskemen Jylý jelileri«, Altaı qalasyndaǵy «Shyǵysenergo« uıymdarynda júrgizilmek», - dedi ol.
Sonymen qatar jylý tapshylyǵy máselesi de sheshilýde. Óskemenniń sol jaǵalaýyndaǵy turǵyn úı qurylysy jumystarynyń qarqyndy júrgizilýine baılanysty jáne aldaǵy bes jylǵa arnalǵan qurylys josparlaryn eskergende 2026 jylǵa qaraı jylý energııasynyń tapshylyǵy saǵatyna 373,6 Gkaldy quraýy yqtımal.
«Semeılikter tarapynan túsken kóptegen shaǵymdarǵa baılanysty qalanyń jylýmen jabdyqtaý júıesin zertteý maqsatynda arnaıy komıssııa quryldy. Saýalnama nátıjeleri boıynsha «Gabbasova», «103-103A», «Tsentr», «35 kvartal» qazandyqtarynyń jáne shahardyń oń jaǵalaýyndaǵy jylý jelileriniń talapqa saı emestigi anyqtaldy. Sondyqtan kelesi jylytý maýsymy bastalǵanǵa deıin qazandyqtardy qalypqa keltirý úshin tıisti sharalar atqarylady», - dedi Nurlan Ramazanov.