Shyǵys Qazaqstanda «Gonkong tumaýyn» juqtyrǵandar sany 25-ke jetti

ÓSKEMEN. KAZINFORM – Shyǵys Qazaqstan oblysynda «Gonkong tumaýyna» shaldyqqandar sany artyp keledi.

ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, óńir boıynsha 63 myńnan astam adamǵa JRVI dıagnozy qoıylǵan. Bul kórsetkish ótken jylǵy kezeńmen salystyrǵanda 15,9%-ǵa artyp otyr.

- Búginde A/H3N2 vırýsy, ıaǵnı «Gonkong tumaýyn» juqtyrǵandar sany 25-ke jetti. Onyń ishindegi 10-y on tórt jasqa deıingi balalar. Bir jasqa deıingi sábıler, júkti áıelder nemese ekpe alǵan adamdar arasynda tumaýdyń bul túrin juqtyrý jaǵdaıy tirkelmegen, - delingen aqparatta.

Sonymen qatar oblysta rınovırýs (63 jaǵdaı), bokavırýs (1 jaǵdaı), adenovırýs (29 jaǵdaı) jáne basqa da respıratorlyq ınfektsııalar tirkelip jatyr.

Shyǵys Qazaqstan turǵyndarynyń 10 paıyzdan astamy, naqty aıtqanda 77 myń adam tumaýǵa qarsy vaktsına saldyrdy.

Eske salsaq, osyǵan deıin Shyǵys Qazaqstan oblysynda oqýshylar arasynda maýsymdyq ınfektsııa juqtyrǵandar sany kóbeıgendikten, sabaq onlaın formatqa aýysyp jatqany habarlanǵan.