ShQO-da qar kóshkinin túsirý úshin 4 ýchaskede jarylys jasaldy

ASTANA. QazAqparat - Shyǵys Qazaqstanda qar kóshkini bolýy yqtımal 325-ten astam ýchaske bar. Solardyń birqatarynda jasandy qar kóshkinin týdyrý úshin jarylys jasaldy, dep habarlaıdy QazAqparat.

Óńirde qar jaýyp, jel soǵyp tur. Osyǵan baılanysty qar kóshkini qaýpi saqtalady. Betkeılerde jınalǵan qar massasyn «Qazseldenqorǵaý» ShQ fılıalynyń mamandary qoldan jarylys jasaý arqyly túsirdi.

«Óskemen-Altaı» avtojolynda jer bederi jaǵynan eń kúrdeli ýchaskelerdiń biri ornalasqan. ShQ fılıalynyń mamandary men ShQO TJD qutqarýshylary 4 jarylys jasap, 11660 tekshe metr qar túsirdi.

«Qar jamylǵysynyń qurylymy men onyń qozǵalysyna taldaý jasalady. Sodan keıin qar kóshkinin túsirý týraly sheshim qabyldanady», - dep túsindiredi Qazseldenqorǵaý fılıalynyń ShQ basshysy Omar Dúzgimbaev.

Qutqarýshylar bes-jeti tekshe metr bolatyn shaǵyn qar kóshkininiń ózi adamǵa zııan tıgizýi múmkin deıdi. Sondyqtan týrıster men avtojoldardyń qaýipti ýchaskelerinen ótip bara jatqan júrgizýshilerge aldyn ala aýa raıy boljamyn qarap alý usynylady.

Foto: ShQO TJD