ShQO-da ıesiz ıtke oq atqan adam izdestirilip jatyr

ÓSKEMEN. KAZINFORM – Shyǵys Qazaqstan oblysy Glýbokoe aýdanynda belgisiz bireý kóshedegi buralqy ıtke oq atqan.

ShQO Polıtsııa departamenti baspasóz qyzmetiniń málimetine súıensek, oqıǵa Glýbokoe aýdanyndaǵy Beloýsovka kentinde boldy. Keshki ýaqytta dalada oınap júrgen balalar oq atylǵan daýysty estip, sol jaqqa qaraı júgirgen. Olardyń aıtýynsha, belgisiz er adam ıesiz ıtti atyp, sol jerden ketip qalǵan.

«102» jedel arnasyna habar túse salysymen polıtseıler oqıǵa ornyna kelip jetti. Kýágerlerden, kóshe turǵyndarynan suraqtarǵa jaýap alyndy. Qazirgi ýaqytta kúdiktiniń kim ekenin anyqtaý úshin tıisti sharalar júrgizilip jatyr», - delingen aqparatta.

Kent turǵyndary ıtti veterınarlyq klınıkaǵa jetkizgen. Moıyn tusynan jaralanǵan ıt «Dosym» janýarlardy saýyqtyrý ortalyǵyna jatqyzyldy.