ShQO-da esirtki saýdasymen aınalysqan er adam Reseıge ekstradıtsııalandy

ÓSKEMEN. QazAqparat – Shyǵys Qazaqstan oblysynda esirtki saýdasymen aınalysqan er adam Reseıge ekstradıtsııalandy, dep habarlaıdy QazAqparat tilshisi.

ShQO boıynsha Qylmystyq atqarý júıesi departamenti baspasóz qyzmetiniń málimetine súıensek, K. esimdi azamat óńir aýmaǵynda qylmystyq top quryp, esirtki jáne geroın satýmen aınalysqan. Er adam ustalyp, OV-156/15 qaýipsizdigi eń joǵary mekemesine qamaýǵa alyndy.

«QR Qylmystyq Kodeksiniń 259-baby 4-bóliginiń «a» tarmaǵymen sottalǵan ol merzimniń kóp bóligi aıaqtalǵannan keıin Bas prokýratýraǵa Reseı Federatsııasyna ekstradıtsııalaý týraly ótinish jazdy. Óz sózinde qazirgi ýaqytta otbasy men týystary sol jaqta turatynyn jetkizdi. Reseı tarapynan qajetti aqparat pen sottalǵandy qabyldaý týraly rastaýdy alǵan Bas prokýratýra jazasyn óteýshini ekstradıtsııalaýǵa kelisti», - delingen aqparatta.

Azamattardy ekstradıtsııalaý eki el arasynda jasalǵan sharttar negizinde júzege asyrylady. Bas prokýratýranyń málimetinshe, Qazaqstan Reseı Federatsııasymen, Ózbekstan, Qyrǵyzstan, Belarýs, Ázerbaıjan, Armenııa, Grýzııa jáne Tájikstan elderimen ekstradıtsııalaý týraly kelisim jasasqan.