ShQO-da Ekologııa departamentiniń eki basshysy paramen ustaldy

ASTANA. KAZINFORM – Shyǵys Qazaqstan oblysynda Ekologııa departamentiniń basshylyǵy sottalyp jatyr. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.

- Bıyl 10 qańtarda Shyǵys Qazaqstan oblysynda Óskemen qalasynyń soty oblystyq Ekologııa departamenti basshysynyń orynbasary R. Turarovqa qatysty úkim shyǵardy. Ol ekologııalyq ruqsatsyz altyn óndiretin zaýyt salý faktisi boıynsha ákimshilik jaýapkershilikke tartpaǵany úshin jergilikti kásipkerden 30 000 AQSh dollary kóleminde para alǵany úshin kináli dep tanyldy, - dedi Danııar Bıgaıdarov agenttikte ótken baspasóz máslıhatynda.

Sondaı-aq R.Turarov memlekettik qyzmette jáne kvazımemlekettik sektorda qyzmet atqarý quqyǵy shektelip, 7 jylǵa bas bostandyǵynan aıyryldy.

- Aldyn alý sharalary aıasynda úkimdi jarııalaý ashyq rejımde oblystyq Ekologııa departamenti qyzmetkerleriniń qatysýymen ótti, - deıdi ol.

Sot aktisi zańdy kúshine engen joq.

Odan bólek, Antıkor ókili Shyǵys Qazaqstan oblysy boıynsha Sybaılas jemqorlyqqa qarsy qyzmet oblystyq Ekologııa departamenti basshysynyń mindetin ýaqytsha atqarýshyǵa qatysty tergeýdiń aıaqtalǵanyn aıtty.

- Sheneýnik buryn kelisilgen 130 mln teńgeniń 8,5 mln teńgesi somasynda kommertsııalyq uıym dırektorynyń orynbasarynan kásiporyndy emıssııa tólemeı avtojol tósemin qaıta jańartý faktisi boıynsha ákimshilik jaýapkershilikke tartpaǵany úshin para aldy degen kúdikke ilindi, - deıdi ol.

Sottyń sanktsııasymen kúdiktiler qamaýǵa alyndy.

Buǵan deıin habarlaǵanymyzdaı Antıkor jemqorlardy elden shyǵýǵa tyıym salý jaǵyn qarastyryp jatyr.