ShQO-da eki balyqshy muz astyna túsip ketti

ÓSKEMEN. KAZINFORM – Shyǵys Qazaqstan oblysynda muz astyna qulaǵan eki balyqshy qutqaryldy.

ShQO Tótenshe jaǵdaılar departamenti baspasóz qyzmetiniń málimetine súıensek, Ulan aýdanyndaǵy Sibe kólinde muz astyna túsken eki balyqshyny jaqyn mańda júrgen adamdar qutqaryp qaldy. 

«Balyqshynyń biri muz ústinde júrip kele jatyp, kenet astyna túsip ketti. Óskemen qalasynyń turǵyny Aleksandr Alekseev muny baıqap, abdyrap qalmaı sol adamǵa tross laqtyrǵan. Sonyń kómegimen ol balyqshyny shyǵaryp aldy», - delingen aqparatta.

Aleksandr jáne onyń qasyndaǵy basqa da azamattar kólden úıge ketýge jınalyp jatqanda muz astyna qulaǵan taǵy bir adamdy kórdi. 

«Er adamǵa eńbektep muzǵa shyq dep aıqaıladym. Sodan keıin kómek kórsetken basqa adamdarmen birge oǵan arqan men shanany laqtyrdyq. Áıteýir azamat qorqynyshyn jeńip, sýdan shyǵyp, shanaǵa jete aldy. Basqa kýágerlermen birge ony qaýipsiz aımaqqa shyǵardyq», - deıdi Aleksandr Alekseev.

Talǵatjan Muhametbekuly