ShQO-da egin jınaý kezinde kombaın otqa orandy

ÓSKEMEN. KAZINFORM – Shyǵys Qazaqstan oblysy Altaı aýdanynda egin jınaý kezinde kombaın órtendi. 

Oqıǵa Altaı aýdany Ermakovka aýylynda bolǵan. Bul týraly ShQO Tótenshe jaǵdaılar departamentiniń baspasóz qyzmeti habarlap otyr.

«Esil-760» markaly kombaında kúnbaǵys jınaý kezinde órt shyqty. Sol jerge órt sóndirýshiler shuǵyl kelip jetti. Kóp uzamaı jalpy aýdany 20 sharshy metr aýmaqty quraǵan qyzyl jalyn tolyqtaı aýyzdyqtady», - dep habarlady vedomstvo ókilderi.

Abyroı bolǵanda, zardap shekken eshkim joq. Osy rette, qutqarýshylar óńir jurtshylyǵyna barynsha abaı bolyp, órt qaýipsizdigi erejelerin qatań saqtaý qajettigin eskertti.

Eske salsaq, buǵan deıin ShQO-daǵy kásiporyndardyń jumysshylarǵa qaryzy 60 mln teńgeden asatyndyǵy habarlanǵan.