ShQO-da bıyl jol-kólik oqıǵalarynyń sany kúrt ósti

ÓSKEMEN. KAZINFORM – Shyǵys Qazaqstan oblysynda jyl basynan beri jol apattarynyń sany kúrt ósip otyr. 

ShQO prokýratýrasynyń málimetinshe, 2023 jyly óńir boıynsha 443 jol apaty tirkelse, byltyr bul kórsetkish 847-ge jetken. Al osy jyldyń basynan beri 1 093 jol-kólik oqıǵasy boldy. Keıingi úsh jylda 133 asa aýyr jol apatynan 180 adam kóz jumǵan. 

– Apattardyń 87%-y jeńil kólik júrgizýshileriniń kinásinen bolady. Qaza bolǵandardyń arasynda 52 júrgizýshi, 89 jolaýshy, 34 jaıaý júrginshi jáne 2 velosıpedshi bar. Onyń ishindegi bala sany – 22. Jolda 119 er adam men 58 áıel mert boldy. 94 ata-ananyń qazasynan keıin 179 bala jetim qaldy, - delingen aqparatta. 

Jol apatynyń negizgi sebepteri:

– jyldamdyqty ruqsat etilgen shekten asyrý;

– qarsy jolaqqa shyǵý;

– manevr jasaý erejelerin óreskel buzý;

– jaıaý júrginshilerge jol bermeý;

– júrgizýshilerdiń salǵyrttyǵy jáne t.b.

Sondaı-aq ishimdik iship rólge otyratyndar az emes. 17 mas júrgizýshiniń kesirinen 21 adam, sonyń ishinde 1 bala kóz jumdy. Bul ister boıynsha 59 adam sottaldy. Bıyldyń ózinde mas kúıde kólik júrgizgen 1 160 júrgizýshi jaýapqa tartylyp, onyń 75-ine qatysty qylmystyq is qozǵaldy.

– Bizdiń maqsat – joldaǵy zańbuzýshylyqqa múlde tózbeý qaǵıdatyn qalyptastyrý. Eger siz tártip buzýshylyqty kórseńiz, beıjaı qalmańyz. Sol arqyly bireýdiń ómirin saqtap qalýyńyz múmkin, - deıdi ShQO prokýratýrasynyń qoǵam múddesin qorǵaý basqarmasynyń aǵa prokýrory Raýan Saıranbekuly. 

Eske salsaq, osyǵan deıin Aqtóbede úsh kólik soqtyǵysyp, júrgizýshi men jolaýshy kóz jumǵany habarlanǵan.