ShQO-da balyqty zańsyz aýlaǵandardyń ústinen is qozǵaldy
ShQO Polıtsııa departamentiniń málimetinshe, óńirde 16 sáýir men 31 mamyr aralyǵynda «Bekire – 2020» sharasy ótkizilýde. Sonyń aıasynda búginde balyq aýlaý erejelerin buzý faktileri boıynsha 3 qylmys ashylyp, 230-ǵa jýyq ákimshilik hattama toltyrylǵan.
«24 mamyr kúni tártip saqshylary ShQO orman sharýashylyǵy jáne janýarlar dúnıesi aýmaqtyq ınspektsııasy Semeı qalalyq bóliminiń ınspektorlarymen birlesip Balyqtykólde kezekti reıd júrgizdi. Shara barysynda «Semeı-Kýrchatov» tasjolynyń 74-shaqyrymynda 53 jastaǵy er adam tizgindegen «ÝAZ» markaly kólik toqtatyldy. Tekserý kezinde salonnan 3 sıntetıkalyq aý, 1 úrlemeli qaıyq, sorǵy men eskekter, rezeńkeli etik, qaptarǵa salynǵan salmaǵy 200 keliden asatyn 199 tuqy balyǵy jáne 1 shortan tárkilendi», - dep habarlady vedomstvo ókilderi.
Qazirgi ýaqytta atalǵan fakti boıynsha QR QK-niń 335-babyna sáıkes sotqa deıingi tergeý amaldary júrgizilýde.