ShQO-da balyqshylar ajyraǵan muz ústinde qalyp qoıdy
ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 13 sáýirde keshki ýaqytta Tarbaǵataı aýdanynda bolǵan.
«Tuǵyl aýylynan 3-5 shaqyrym jerdegi Zaısan kólinde eki balyqshy juqa muz betine shyqqan. Keshke qaraı qaıtyp kele jatqan kezde muz bólinip ketip olar 500-800 metr qashyqtyqta tas qarańǵyda jaǵadan jyraqta qalyp qoıdy. Balyqshylardyń kómek surap aıǵaılaǵan daýsyn sol mańda júrgen turǵyndar estip qalǵan. Biraq olardyń naqty ornalasqan jerin kórmedi. Al muzda qaıyqpen júrý múmkin emes edi, jaıaý júrý de qaýipti boldy», - delingen aqparatta.
Turǵyndar qutqarýshylarǵa habarlasyp, kómek suraǵan. Oqıǵa ornyna shuǵyl jetken aýdandyq TJB qyzmetkerleri rezeńke qaıyqpen balyqshylarǵa kómekke attandy. Sonymen qatar Óskemennen departamenttiń jedel qutqarý jasaǵynyń mamandary sý men batpaqty jerlerde júrýge qabiletti, ótimdiligi joǵary «Sherp» avtokólikterimen jolǵa shyqqan.
«Balyqshylardy qutqarýǵa birneshe saǵat qajet boldy. Sebebi borpyldaq muz ben qarańǵylyq jaǵdaıdy qıyndatty. Balyqshylar juqa muzda tońyp, ábden álsirep qalǵan. Qutqarýshylar men qaıyqqa mingen jergilikti turǵyndardyń birlesken áreketi arqasynda 45 jáne 44 jastaǵy eki adam aman-esen jaǵaǵa shyǵaryldy. Balyqshylarǵa medıtsınalyq kómek qajet bolmady», - delingen habarlamada.
