ShQO-da balalar oıynshyqtarynan aǵzany ýlaıtyn zattar anyqtaldy

ÓSKEMEN. KAZINFORM — Shyǵys Qazaqstan oblysynda osy jyldyń basynan beri sanıtarlyq dárigerler saýda salasynda júzdegen tekserý júrgizip, formaldegıd qosylǵan balalar oıynshyqtaryn anyqtady. 

ShQO sanıtarlyq-epıdemıologııalyq baqylaý departamentiniń mamandary bıyl barlyǵy 497 tekserý júrgizdi. Laboratorııalyq zertteýlerdiń nátıjesinde 133 jaǵdaıda sanıtarlyq talaptarǵa saı kelmeıtin ónimder anyqtalǵan.

Zerttelgen 301 azyq-túlik úlgisi men 196 turmystyq buıymnyń úlgisinen zań buzý tirkeldi.

— Mundaı tekserýler qaýipti ónimdi der kezinde anyqtap, aınalymnan alyp tastaýǵa múmkindik beredi. Biz tek iriktep qana emes, barlyq alynǵan úlgige zerthanalyq saraptama júrgizemiz. Zańbuzýshylyq anyqtalǵan jaǵdaıda jedel sharalar qabyldaımyz, — dedi departament basshysy Qanat Týrdıev.

Anyqtalǵan zań buzýdyń biri — sút ónimderin falsıfıkatsııalaý. Saraptama nátıjesi boıynsha úsh ónimnen maı qyshqyldarynyń quramy belgilengen normalarǵa saı kelmegen. Bul jaǵdaıda súttiń ornyna ósimdik maılary qoldanylýy múmkin.

Sondaı-aq balalarǵa arnalǵan oıynshyqtardan da qaýip anyqtaldy. Halk keıipkeriniń oıynshyǵynan formaldegıd mólsheri normadan eki ese artyq ekeni laboratorııalyq jolmen dáleldendi. Bul zat uzaq ýaqyt boıy áser etse, aǵzany ýlaıdy.

— Alty aı ishinde jalpy salmaǵy 52 keliden astam sapasyz ónim aınalymnan alyndy. Olardyń jalpy quny 576 myń teńgeden asady. Bul kólemniń 36,7 kelisi — azyq-túlik ónimderi, al qalǵan bóligi — oıynshyqtar, kosmetıka, qaptama materıaldary men kıim-keshek.

Jyl basynan beri 47 ákimshilik tergeý bastalyp, 32 jospardan tys tekserý taǵaıyndalǵan. Bul tekserýler mekemelerdiń aldyńǵy eskertýlerdi oryndamaýy sebepti júrgizilgen.

Eske salsaq, osyǵan deıin Petropavlda jasóspirim oıynshyq vıntovkamen kóshede júrgeni habarlanǵan.