ShQO-da aıyppulyn tólemegen 76 júrgizýshiniń kóligi arnaıy turaqqa qoıyldy
ShQO Polıtsııa departamenti baspasóz qyzmetiniń málimetine súıensek, «Quqyqtyq tártip» jedel aldyn alý sharasy barysynda tártip saqshylary jol erejesin buzyp, aıyppuldy tólemegen júrgizýshilerdi toqtatýda.
2 kún ishinde 979 qaýly oryndalyp, 10 mln 159 myń teńge óndirildi. Ákimshilik aıyppuldardy tólemegeni úshin 76 júrgizýshiniń avtokóligi mamandandyrylǵan turaqqa qoıyldy.
«Máselen, polıtsııa qyzmetkerleri Óskemen qalasynyń 25 jastaǵy turǵyny tizgindegen «VAZ 21123» markaly kólikti toqtatty. Tekserý kezinde er adamnyń «Sergek» apparattyq-baǵdarlamalyq keshenimen avtomatty rejımde tirkelgen 10 tólenbegen aıyppuly bar ekeni anyqtaldy. Barlyq buzýshylyqtar QR ÁQBtK-niń 592-baby (belgilengen qozǵalys jyldamdyǵyn arttyrý) boıynsha jasalǵan. Osyǵan baılanysty boryshkerdiń kóligi aıyppuldardy tolyq ótegenge deıin mamandandyrylǵan turaqqa qamaldy», - delingen aqparatta.
