ShQO-da aýyl turǵynynyń qorasyndaǵy 15 qoıyn sileýsin qyryp ketti
ÓSKEMEN. KAZINFORM - Shyǵys Qazaqstan oblysy Samar aýdanynda 15 qoıdy sileýsin qyryp ketti.
Aýdan ákimdiginiń málimetine súıensek, oqıǵa Bastaýshy aýyldyq okrýgine qarasty Kókjota aýylynda bolǵan.
"Qoraǵa kirip ketken belgisiz jyrtqysh ań 15 qoıdy qyryp ketti. Boljam boıynsha bul - sileýsin.
Sebebi qasqyr bolsa qoıdy jaryp keter edi, al bul jyrtqysh tek qanyn ishken. Oqıǵa ornyna birden aýdan ákimi Nurlan Mahambetov pen aýyldyq okrýg ákimi Arman Keńesbekov, jergilikti polıtsııa bóliminiń qyzmetkerleri bardy. Mal ólekseleri arnaıy kómýge arnalǵan orynǵa kómiledi. Sebebi jyrtqyshtyń silekeıinde túrli qaýipti aýrýlar bolýy yqtımal", – deıdi aýdan ákiminiń orynbasary Qaıdar Surashev.
Qazirgi kezde aýyldyq okrýg ákimdigi keltirilgen shyǵyndy eseptep jatyr.
