ShQO-da alǵash ret esirtki taratyp júrgender týraly aqparat bergen adamǵa syıaqy tólendi

ÓSKEMEN. KAZINFORM – Shyǵys Qazaqstan oblysynda alǵash ret esirtki taratyp júrgender týraly aqparat bergen adamǵa 305 myń teńge kóleminde syıaqy tólendi.

ShQO prokýratýrasy baspasóz qyzmetiniń málimetine súıensek, qańtar aıynda óńir aýmaǵynda esirtki taratylyp jatqanyna qatysty aqparat kelip tústi.

- Júrgizilgen tıisti is-sharalar nátıjesinde kúdikti ustalyp, odan 60 gramnan astam sıntetıkalyq esirtki tárkilendi. Sot-hımııalyq saraptama qorytyndysy boıynsha tárkilengen zat α-PVP psıhotroptyq zaty ekeni anyqtaldy. Qazir er adam ýaqytsha ustaý ızolıatoryna qamaýǵa alynǵan, - delingen aqparatta.

Prokýratýraǵa shynaıy aqparat bergen azamatqa 305 myń teńge kóleminde aqshalaı syıaqy tólendi.

Aıta keteıik, «STOP esirtki!» jobasy azamattyq qoǵamdy esirtkiniń taralýyna qarsy kúreske belsendi túrde tartýǵa baǵyttalǵan. Sonyń aıasynda esirtki týraly aqparat bergen adamǵa aqshalaı syıaqy tólenedi.

- Eger sizde esirtki taratyp júrgender týraly qandaı da bir málimet bolsa 8-771-659-53-22 telefonyna habarlaýyńyzdy suraımyz. Júgingen azamattarǵa qupııalylyq pen qaýipsizdikke kepildik beriledi, - delingen habarlamada.

Eske salsaq, osyǵan deıin Atyraý oblysynda 1 jylda 250 keliden astam esirtki tárkilengeni habarlanǵan.