ShQO-da agroónerkásip kesheni qarqyndy damyp keledi
Memleket basshysynyń agroónerkásiptik sektordy damytý boıynsha alǵa qoıǵan mindetterin sheshý úshin Shyǵys Qazaqstan oblysynda ósimdik sharýashylyǵyn damytý baǵdarlamasy iske asyrylyp jatyr, tıimdiligi joǵary daqyl alqaptaryn ulǵaıtyp, egistikterdi ártaraptandyrý júrgizilýde.
Elimizde ósiriletin kúnbaǵys kóleminiń 66% osy oblysqa tıesili jáne ony qaıta óńdeý kólemin ulǵaıtý basty mindet bolyp otyr.
«Joǵary sapaly daıyn ónim naryǵyna shyǵý úshin bıylǵy jyl basynan beri oblysta qýaty 300 myń tonna iri maı-ekstraktsııalyq zaýyt paıdalanýǵa berildi, Óskemen qalasynda qýaty 50 myń tonna kúnbaǵys maıy zaýyty salynyp jatyr. Osylaısha, jumys istep turǵan óndiristerdi eskere otyryp, jańa maı-ekstraktsııalyq zaýyttardyń iske qosylýy qaıta óńdeýdiń jalpy kólemin 1 mln tonnaǵa deıin, sondaı-aq ósimdik maılarynyń eksportyn 1,3 ese ulǵaıtýǵa múmkindik beredi», - dedi ShQO ákimi Danıal Ahmetov Ortalyq kommýnıkatsııalar qyzmetindegi baspasóz máslıhatynda.
Ákimniń aıtýynsha, oblystyń mal sharýashylyǵy da turaqty damyp keledi. Ótken jyly iri qara mal sany 106%-ǵa, usaq mal – 106,2%, jylqy – 112,5%, qus – 110,5%-ǵa ósti. Tiri salmaqta et óndirý sharýashylyqtardyń barlyq sanattarynda 103,2%-ǵa, sút óndirý 104,8%-ǵa ósti. Jyl sońyna deıin sút óńdeý kásiporyndarynyń júktemesi 96%-ǵa deıin artady, - dep tolyqtyrdy óńir basshysy.
Odan bólek, sút ónimderin shyǵarýmen aınalysatyn «Emıl» kompanııasy jylyna 45-ten 90 myń tonnaǵa deıin taýar assortımenti men kólemin keńeıtip jatyr. Óskemen qus fabrıkasy qaıta jańartýdy aıaqtap, qus etin shyǵarý kólemin jylyna 55 myń tonnaǵa deıin ulǵaıtýda. Qýaty jylyna 1,5 myń tonna balyq jáne balyq ónimderin quraıtyn akvaferma paıdalanýǵa berildi.
Oblys ákimi aýyldyq jerlerdi damytý úshin Memleket basshysy qoldaǵan «Aýyl-El besigi» baǵdarlamasy aýyldyń áleýmettik-ınfraqurylymdyq damýynyń negizin qalyptastyratynyn jáne halyqtyń ómir súrý sapasynyń parametrlerin óńirlik standarttarǵa deıin teńestirýge múmkindik beretinin aıtty. Bıyl «Aýyl-El besigi» baǵdarlamasy boıynsha 42 tirek jáne spýtnıktik aýylda 5,2 mlrd.teńgege 67 joba iske asyrylatyn bolady.
