ShQO-da 560 myńnan astam adam seısmıkalyq qaýipti aımaqta turady
ÓSKEMEN. KAZINFORM — Shyǵys Qazaqstan oblysynda 75 eldi meken seısmıkalyq qaýipti aımaqta ornalasqan.
ShQO Tótenshe jaǵdaılar departamentiniń málimetine súıensek, óńirde jer silkinýi yqtımaldyǵy bar aýmaqta 560 myń adam men 150 myńnan astam úı bar.
Osy jyldyń basynan beri oblysta kúshi eki baldan joǵary seziletin jer asty dúmpýleri tirkelmegen. Dese de aımaqta monıtorıng júıesin jetildirý jáne yqtımal tótenshe jaǵdaılarǵa daıyndyq sharalary kúsheıtilip jatyr.
— Shyǵys Qazaqstan aýmaǵynda eki seısmologııalyq stantsııa jáne onlaın rejımde jumys isteıtin 12 seısmodatchık bar. Olar derekterdi Ortalyq seısmologııalyq observatorııaǵa úzdiksiz jiberip otyrady, — delingen aqparatta.
Datchıkterdiń basym bóligi Óskemen qalasynda ornatylǵan. Sonymen qatar Altaı, Samar jáne Katonqaraǵaı aýdandarynda bir-bir seısmodatchıkten jumys isteıdi.
— Halyqty qulaqtandyrý júıesi de kúsheıtilip keledi. Qazirgi ýaqytta oblysta 48 sırenalyq-dybys qurylǵysy jumys istep tur. Budan bólek, shuǵyl habar taratý úshin tele jáne radıoarnalardy avtomatty túrde toqtatý júıesi iske qosylǵan. Mass Alert mobıldi eskertý júıesi de engizilgen. Oblys aýmaǵynda zardap shekken turǵyndardy qabyldaıtyn 182 pýnkt jáne adamdardy ýaqytsha ornalastyrýǵa arnalǵan 41 ashyq alań bar, — delingen habarlamada.
Seısmıkalyq qaýipsizdik aılyǵy aıasynda Shyǵys Qazaqstanda 849 oqý-jattyǵý ótkizilip, oǵan 43 myńnan astam adam qatysqan.
Eske salsaq, osyǵan deıin Kaspıı teńizinde jer silkinisi tirkelgeni habarlanǵan.
