ShQO-da 40-qa jýyq jylqy urlaǵandar ustaldy
ÓSKEMEN. QazAqparat – Shyǵys Qazaqstan oblysynda 40-qa jýyq jylqy urlaǵan 4 er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, osydan birneshe kún buryn polıtsııa qyzmetkerleri Abaı aýdanynda erkin jaıylymnan 13 jylqy urlaǵan 24 jastaǵy turǵyndy ustady. Osynyń saldarynan mal ıesine keltirilgen materıaldyq zalal – 5 mln teńgeni quraǵan.
«Sondaı-aq tártip saqshylary 25 jáne 40 jas aralyǵyndaǵy taǵy úsh er adamdy quryqtady. Olar ótken jyldyń maýsym-qarasha aılarynda qaraýsyz jaıylyp júrgen 24 bas jylqyny urlaǵan. Kúdiktiler sot sanktsııasymen qamaýǵa alyndy», - dedi oblystyq PD bastyǵynyń orynbasary Talǵat Shaıahmetov.
Qazirgi ýaqytta atalǵan faktiler boıynsha QR QK-niń 188-baby 2-bóligine (mal urlyǵy) sáıkes sotqa deıingi tergeý amaldary júrgizilýde. Ustalǵandar 7 jylǵa deıin bas bostandyǵynan aıyrylýy múmkin.
