ShQO-da 3 myńnan astam úıge órtti anyqtaıtyn datchık ornatylady
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar halyqty jylytý kezeńine daıyndaýda. Olar eń aldymen 3000-nan astam áleýmettik turǵyda osal otbasy turatyn úılerdi aralap ótedi.
TJD qyzmetkerleri peshterdi tekseredi, órttiń aldyn alý boıynsha usynymdar beredi jáne kómirtegi totyǵymen ýlanýdy boldyrmaý úshin shuǵyl túrde joıýdy qajet etetin buzýshylyqtardy kórsetedi. Qazirgi ýaqytta áleýmettik turǵyda osal otbasylardyń úılerine jergilikti atqarýshy organdar men demeýshiler jyl saıyn satyp alatyn órtti jáne ýly gazdy anyqtaıtyn arnaıy datchıkterdi ornatyp jatyr.
«Ótken jylytý maýsymynda osyndaı datchıkter Glýbokoe jáne Ulan aýdandarynda der kezinde iske qosylyp, 8 adamdy qutqaryp qaldy. Sońǵy 4 jylda datchıkterdiń arqasynda barlyǵy 37 adam, onyń ishinde 28 bala qutqaryldy.
«Aqyldy qurylǵylar» eń aldymen kópbalaly otbasylar, jalǵyzbasty zeınetkerler, múmkindigi shekteýli jandar men az qamtylǵan otbasylar turatyn úılerge ornatylady», - deıdi oblystyq TJD bastyǵynyń orynbasary Serik Amangeldın.
Datchıkterdi ornatý jumystary búkil oblys boıynsha júrgizilip jatyr. Kezekti reıd barysynda departament qyzmetkerleri Ulan aýdany Verh-Berezovka kentine baryp qaıtty. Datchıkter kópbalaly jáne az qamtylǵan otbasylardyń úıine ornatyldy.