ShQO-da 160 myń gektar jer memleket menshigine qaıtarylady

ÓSKEMEN. KAZINFORM – Shyǵys Qazaqstan oblysynda bıyl 160 myń gektar jer memleket menshigine qaıtarylady.  

ShQO Jer qatynastary basqarmasynyń málimetine súıensek, 2022 jyly aýylsharýshylyǵy maqsatynda qoldanylmaı bos jatqan jerlerdi qaıtarý jumystary bastalǵanda bir jyl ishinde 100,6 myń gektar jer qaıtarylǵan. 2023 jyly jer ıeleri óz erkimen 125,7 myń gektar jerdi qaıtardy. Al, osy jyly 160 myń gektar jerdi memleket menshigine qaıtarý josparlanyp otyr.

«Memleket basshysynyń paıdalanylmaıtyn aýylsharýashylyǵy maqsatyndaǵy jerlerdi memleket menshigine qaıtarý týraly tapsyrmasyn iske asyrý maqsatynda jyl basynan beri 58 myń gektardan astam jer qaıtaryldy. Bul jyldyq jospardyń 36%-yn quraıdy. Eń kóp jer qaıtarǵandar Kúrshim (14,8 myń ga), Altaı (3,9 myń ga) aýdandarynda jáne Óskemen qalasynda (408,4 ga) tirkeldi, - deıdi basqarma basshysy Nadejda Mıheılıs.

Jer kodeksine sáıkes jer ıeleri ýchaskelerdi maqsatty túrde paıdalanýǵa mindetti. Áıtpegende, olar májbúrlep alynýy múmkin. Jerdi paıdalaný talaptaryn buzǵany úshin jer ıelerine aıyppuldar salynyp, salyq stavkalary 20 esege artady.

«Basty kedergilerdiń biri – jer ıelerin anyqtaý. Kóbinese olar shetel asyp ketedi nemese baılanysqa shyqpaıdy», - deıdi ShQO boıynsha Jer resýrstaryn basqarý departamentiniń basshysy Seısenǵazy Chýkaev. 

Eske salsaq, buǵan deıin ShQO-da qurylysy «jyr» bolǵan Osınov asýyndaǵy jol qaıta salyna bastaǵany týraly jazǵan edik.