ShQO ákimi Shyńjańnyń Altaı aımaǵynyń basshysy Jeńis Hadespen kezdesti
ASTANA. KAZINFORM - Shyǵys Qazaqstan oblysynyń ákimi Ermek Kósherbaev Qytaı Halyq Respýblıkasynyń ShUAR Altaı aımaǵynyń basshysy Jeńis Hadespen kezdesti, dep habarlaıdy QR SІM baspasóz qyzmeti.
Kezdesý barysynda delegatsııalar aýyl sharýashylyǵy, kólik, logıstıka jáne týrızm salalaryndaǵy yntymaqtastyqtyń qazirgi jaǵdaıy men damý perspektıvalaryn talqylady.
Ertis ózeni arqyly mýltımodaldyq tasymaldaýdy uıymdastyryp, «Maıqapshaǵaı-Zımunaı» jańa shekaralyq temirjoldy salý usynyldy. Sondaı-aq Shyǵys Qazaqstan oblysy men Altaı aımaǵy arasynda tikeleı áýe qatynasyn ashý usynyldy. Delegatsııa ókilderi 2 eldiń arasyndaǵy týrızmdi damytý máselelerin de talqylady.
Oblys ákimi Ermek Kósherbaev «Qanas kóli– Marqakól kóli– Katonqaraǵaı aýyly» transshekaralyq týrızm marshrýtyn damytý boıynsha birqatar usynystaryn atap ótti.
Aıta keteıik, bul joba Memleket basshysy jarııalaǵan «QHR-daǵy Qazaqstan týrızmi jyly» aıasynda óńirde týrızm salasyn damytýǵa múmkindik beredi.
