ShQO ákimi Joldaýdy iske asyrý josparyn usyndy

ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov keńeıtilgen keńes barysynda Prezıdent Joldaýynyń barlyq baǵyttary boıynsha naqty ındıkatorlary jáne atqarý merzimderi bar tolyq jospardy usyndy, dep habarlaıdy «QazAqparat» HAA aqparat ortalyǵyna silteme jasap.

Oblys ákimi Joldaý baǵyttaryna jeke-jeke toqtala kele, aımaqta atqarylǵan jumystardy atap ótti. Sondaı-aq Elbasy júktegen mindetterdi eske otyryp, aldaǵy mindetterdi aıqyndady.

Birinshi kezekte Danıal Ahmetov «7-20-25» baǵdarlamasy boıynsha jergilikti bıýdjetten bastapqy jarnalardy ishinara sýbsıdııalaý mehanızmin qurýdy tapsyrdy. Bul bıýdjettik saladaǵy bilikti qyzmetkerlerdiń ıpotekaǵa qoljetimdiligin arttyrady. 

Qoljetimdi baspanamen qatar turǵyndar úshin medıtsınalyq qyzmet kórsetý sapasy mańyzdy mánge ıe.

«Ortasha álemdik standart boıynsha jabdyqtalǵan elimizdegi birinshi oblys bolamyz. Bul jańa jabdyqtardy qýalaý emes - jańa tehnolgııalarǵa umtylý. Densaýlyq saqtaý salasynda qýyp jetýshi ıdeologııasynan ozyq ketkenderdiń qataryna qosylýymyz kerek», - dep atap ótti Danıal Ahmetov.

Bul rette ol jergilikti mamandardyń quzyret deńgeıin kóterý qajettiligin atap ótti. Bul rette, 2019 jyldyń 1 qańtaryna deıin jańa jabdyqtarmen jumys isteıtin dárigerler quzyretiniń ortaq standarttaryn daıarlaý tapsyrmasy berildi.

Aımaq basshysy sondaı-aq medıtsınalyq qyzmetkerlerdi shetelde oqytýǵa bólinip otyrǵan bıýdjetti eki ese ósirýdi tapsyrdy. Turǵyndardyń densaýlyǵyna áser etetin faktorlardyń biri - sapaly aýyzsý. Danıal Ahmetov 2025 jylǵa deıin 86 paıyz aýyldyq eldi mekendi ortalyqtandyrylǵan sýmen jabdyqtaý júıesimen qamtamasyz etý mindetin qoıdy.