ShQO: 1300 zeınetker BZJQ-daǵy jınaqtaryn alýǵa asyǵar emes

ASTANA. QazAqparat - Shyǵys Qazaqstanda zeınetkerlik jasqa jetkenimen Biryńǵaı jınaqtaýshy zeınetaqy qorynan jınaqtaǵan qarajatyn áli almaǵan 1300 salymshy bary anyqtaldy. Olardyń jeke shottarynda bir myń teńgeden birneshe mıllıon teńgege deıin aqsha jatyr. Bul jaıynda «Biryńǵaı jınaqtaýshy zeınetaqy qory» AQ-nyń Shyǵys Qazaqstan oblysy boıynsha fılıaly dırektorynyń orynbasary Qarlyǵash Baıdildaeva málimdedi, dep habarlaıdy QazAqparat altaynews.kz saıtyna silteme jasap.

«Biz olardy izdestirip jatyrmyz. Keıbireýlerimen telefon arqyly tildesip, jaǵdaıdy túsindirdik. Kópshiligi ýaqyttyń tapshylyǵyn alǵa tartty. Eger olar qazir, jańa jylǵa deıin kelip, qordaǵy qarajattaryn sheship almasa, 2018 jyldyń 1 qańtarynan jańa tártippen, aı saıyn alatyn bolady», - dep túsindirdi basshy.

Qarlyǵash Naýanqyzy azamattardyń BJZQ-dan zeınetaqy tólemderin alý quqyǵyn der kezinde júzege asyrýyna múmkindikteri bolý úshin Qordyń barlyq fılıaldary 2017 jyldyń 30 jáne 31 jeltoqsany kúnderi jumys isteıtinin eskertti. Bul ásirese, joǵaryda jazylǵan, jınaqtaýshy zeınetaqy qorynan qarajattaryn alýǵa quqyly 1300 salymshyǵa qatysty. Osy kúnderi barlyq operatsııalyq bólimsheler tańǵy saǵat 9.00-den 13.00-ge deıin salymshylarǵa qyzmet kórsetedi. Basty maqsat - BJZQ-dan zeınetaqy tólemderin alý quqyǵy 2018 jyldyń 1 qańtaryna deıin týyndaǵan nemese týyndaıtyn salymshylardyń osy tólemderdi rásimdeý quqyǵyn júzege asyrý.