ShYU-ǵa múshe elder mádenı baılanystardy tereńdetýge múddeli
TAShKENT. KAZINFORM — Shanhaı Yntymaqtastyq Uıymy mádenı baılanystardy tereńdetýge múddeli. Bul usynysty Tashkentte Naýryz meıramyn atap ótken ShYU Halyq dıplomatııasy ortalyǵynyń ókilderi aıtty, dep habarlaıdy Kazinform agenttiginiń menshikti tilshisi.
Ózbekstan astanasynda ótken mádenı is-sharaǵa dıplomattar, Olıı Majlıs depýtattary men Shet elderdegi ultaralyq qatynastar jáne otandastar máseleleri jónindegi komıtettiń basshylyq quramy qatysty.
Onyń barysynda baıandama jasaǵan ShYU Halyq dıplomatııasy ortalyǵynyń dırektory Kabýljon Sabırov Ortalyq Azııa memleketteriniń arasynda ornaǵan yntymaqtastyq rýhy ózge aımaqtarǵa úlgi ekenin atap ótti.
— Ortalyq Azııa elderiniń yntymaqtastyq rýhy ózge aımaqtarǵa úlgi. Memleket basshylarynyń ustanyp otyrǵan syrtqy saıasatynyń nátıjesinde bizdiń óńirde dostyq pen ózara senimge negizdelgen qarym-qatynas ornady. Biz uzaq jyldar boıy sheshimin tappaı kele jatqan máselelerdiń túıinin tarqattyq. Onyń ishinde, shekara jáne kólik-logıstıkalyq problemalar bar. «Alystaǵy aǵaıynnan jaqyndaǵy kórshi artyq», degen támsildiń mánin tolyq túsinip, ıntegratsııany ilgeriletýge kúsh salyp kelemiz, — dedi Kabýljon Sabırov.
Bıyl ShYU aıasynda ekonomıkalyq baılanystardan tys, mádenı-gýmanıtarlyq, ulttyq dástúrlerdi jańǵyrtý baǵytynda jobalar qolǵa alynady. Jalpy jyl ishinde 40-qa jýyq keńes ótkizý josparlanǵan.
— Prezıdent Shavkat Mırzıeevtiń ultaralyq taýlyqty saqtaý men baýyrlas memleketter arasyndaǵy yntymaqtastyqty nyǵaıtý bastamalary joǵary nátıje bere bastady. Tıisinshe, biz barlyq beldi uıymdar aıasynda mádenı baılanystardy nyǵaıtýǵa múddelimiz, — dedi ÓR Shet elderdegi ultaralyq qatynastar jáne otandastar máseleleri jónindegi komıtet tóraǵasy Kahraman Sarıev.
Eske salaıyq, taıaýda Tashkentte ótken jıynda ShYU Aımaqtyq antıterrorlyq qurylymynyń 2030 jylǵa deıingi jospary maquldanǵan bolatyn.
Sonymen birge bıyl aqpanda Qytaı tarapy Tashkentte ótken dóńgelek ústel barysynda ShYU-ǵa tóraǵalyq etý kezeńinde atqaratyn jumystardyń josparymen bólisken edi. Resmı Beıjiń uıym aıasyndaǵy yntymaqtastyqty 8 baǵyt boıynsha ilgeriletpek.