Shyńjań jaılaýynda aqyndar aıtysy ótti — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Mańǵystaýlyq veloshabandoz óz armanyn oryndady — TRT
2024 Parıj Olımpıada oıyndaryna beıbitshiliktiń týyn tasyǵan mańǵystaýlyq veloshabandoz Rábbim Borashev óz armanyn oryndady. Ol 8 el, bes myń shaqyrymnan astam joldan asyp, Frantsııa astanasyna jetti.
Aıta keteıik, Rábbim Borashev jubaıy Aızadamen birge Parıjge jetken bolatyn.
Bul týraly osy aptada Túrkııa Radıo Televızııa portaly da habarlady.
Atalǵan basylymnyń dereginshe, Parıjde Rábbim men Aızada Borashevterdi qazaqstandyqtar, týrıster jáne Qazaqstannyń Frantsııadaǵy ókiletti elshisi Gúlsara Arystanqulova saltanatty túrde qarsy aldy.
Qazaqstan Týrızm jáne sport mınıstri Ermek Marjyqpaev ta elshilikte velosaıahatshy Rábbim Borashevpen kezdesti.
Aıta keteıik, Mańǵystaý oblysy Aqtaý qalasynda maýsym aıynda bastalǵan sapar Parıjdegi Trıýmfalnaıa arkada márecine jetti. Veloshabandoz álemdik sport dodasynda qazaqstandyq sportshylardy qoldaý úshin velosıpedimen arnaıy barǵan bolatyn.
Velosıpedshi aldymen Aqtaýdan Bakýge, sodan keıin Grýzııa arqyly maýsymda Túrkııaǵa jetti. Túrkııada ony Gıresýn oblysynyń gýbernatory Mehmet Fatıh Serdengechtı qabyldap, qonaq qylǵan bolatyn. Ári qaraı batyl shabandoz jubaıy Aızadamen birge Majarstan, Aýstrııa jáne Germanııa arqyly Parıjge jetken.
Eń qaýipsiz elder reıtınginde Ózbekstan birinshi oryndy ıelendi — «ÓzA»
Ózbekstan 121 memleket qamtylǵan «Safety Perception Index 2023» (qaýipsizdikti qabyldaý ındeksi) reıtınginde birinshi oryndy ıelendi. Álemdegi eń qaýipsiz elder reıtınginde Ózbekstan azamattarynyń ómiri men saıahatyna qaýip deńgeıi tómen ekeni atap ótilgen, dep habarlaıdy ózbekstandyq «ÓzA» aqparattyq agenttigi.
Atalǵan BAQ-tyń málimetinshe, Birikken Arab Ámirlikteri, Saýd Arabııasy, Norvegııa jáne Estonııa da qaýipsiz elderdiń bestigine endi.
Ortalyq Azııa elderi arasynda Qazaqstan 14-shi, Tájikstan 17-shi, Qyrǵyzstan 26-shy orynda.
Reıtıngtiń eń tómengi bóligin Gvıneıa, Serra-Leone jáne Malı elderi ıelengen.
«Qaýipsizdikti qabyldaý ındeksi bes faktorǵa baǵyttalǵan: azyq-túlik pen sý, zorlyq-zombylyq qylmysy, qolaısyz aýa-raıy, psıhıkalyq densaýlyq jáne jumys ornyndaǵy qaýipsizdik. Bul faktorlar eldiń qaýipsizdik reıtınginiń negizin quraıtyn ımıdjdi damytý úshin mańyzdy negiz bolyp tabylady», dep jazady ózbekstandyq basylym.
Sondaı-aq, osy aptada «ÓzA» agenttiginde «Samarqand pen Shymkent týrıstik yntymaqtastyqty naǵaıtady» degen taqyryptaǵy aqparat jarııalandy.
Ózbekstandyq BAQ-tyń dereginshe, Samarqand pen Shymkenttiń týrızm salasy ókilderi arasynda ózara yntymaqtastyq týraly memorandýmǵa qol qoıylǵan.
Samarqand qalasyndaǵy «Jibek joly» halyqaralyq týrızm jáne mádenı mura ýnıversıtetinde «Rod-shoý» ótti. Oǵan Samarqand, Samarqand oblysy jáne Qazaqstannyń Shymkent qalasynan týroperatorlar, týragentter, qonaq úı jáne meıramhana menedjerleri qatysty.
Aıta keteıik, bıznes ókilderi óz qalalarynyń týrıstik nysandaryn, sondaı-aq ınvestıtsııalyq jáne týrıstik áleýetin tanystyrdy. Munda eki eldiń týrızm salasynyń ókilderi úshin uıymdastyrylǵan kezdesýler de ótken.
Shyńjań jaılaýynda aqyndar aıtysy ótti — «Halyq gazeti»
Jaqynda Qytaıdyń Іle qazaq avtonomııalyq oblysynyń 19-ynshy kezekti aqyndar aıtysy mádenı týrızm festıvali Shyńjańnyń Іle oblysy Toǵyztaraý aýdany Kóldeneń jaılaýynda ótti, dep habarlaıdy Qytaıdyń «Halyq gazeti».
Aqyndar aıtysy dombyrany súıemel etip, aqyndardyń qolma-qol sýyryp salma qabiletin synaıtyn sóz saıysy. Aıtys — qazaqtar arasynda keń taralǵan ejelgi jáne erekshe óner. Ol 2006 jyly ulttyq materıaldyq emes mádenı muralar tiziminiń birinshi partııasyna engen bolatyn, dep jazdy qytaılyq basylym.
Sonymen qatar osy aptada «Halyq gazeti» basylymynda «Shyńjańnyń Qorǵas portynan Qazaqstanǵa qatynaıtyn arnaıy poshta jelisi iske qosyldy» degen taqyryptaǵy aqparat jaryq kórdi.
Atalǵan BAQ-tyń keltirgen deregine súıensek, elektrondy poshta qazynasy — bul China Post kompanııasy jeńil jáne usaq zattardy transshekaralyq jetkizý qajettilikterin qanaǵattandyrý úshin iske qosqan standartty tikeleı jetkizý bıznesi. Bul transshekaralyq elektrondy kommertsııa platformalary men satýshylarǵa qyzmet kórsetedi.
Shyńjańdaǵy Qorǵas portynda Qazaqstanǵa qatynaıtyn arnaıy elektrondy poshta jelisi resmı túrde ashylǵan.
Qytaılyq BAQ-tyń málimetinshe, arnaıy jeliniń ashylýy kedendik rásimdeýdiń tıimdiligin arttyrýǵa, Qytaı men Qazaqstan arasyndaǵy transshekaralyq elektrondy kommertsııa kásiporyndarynyń operatsııalyq shyǵyndaryn azaıtýǵa jáne turaqty jáne yńǵaıly logıstıkalyq arnany qamtamasyz etýge múmkindik beredi.
Irandyq zertteýshileri jańa terapııamen tuqym qýalaıtyn zaǵıptyqtyń aldyn almaq — Parstoday
Irandyq zertteýshiler ońtaılandyrylǵan rekombınantty vırýstyq vektorlardy oılap tabý arqyly tuqym qýalaıtyn «Retinitis Pigmentosa» aýrýy bar naýqastarda zaǵıptyqtyń aldyn alýda tabysqa jetti, dep habarlady Irannyń «Parstoday» aqparat agenttigi.
Atalǵan basylymnyń málimetinshe, Irandyq zertteýshiler ońtaılandyrylǵan rekombınantty vırýstyq vektorlardy oılap tabý arqyly tuqym qýalaıtyn «Retinitis Pigmentosa» aýrýy bar naýqastarda soqyrlyqtyń aldyn alýda tabysqa jetken.
Aıta ketý kerek, «Retinitis Pigmentosa» aýrýy — kóz tory degeneratsııasynyń bir túri jáne tuqym qýalaıtyn zaǵıptyqtyń eń kóp taralǵan túrleriniń biri, onyń taralýy shamamen jańa týǵan eki myń bes júz náresteniń birin qamtıdy. Bul túngi soqyrlyqqa jáne aqyrynda tolyq zaǵıptyqqa ákeledi.
Irandyq zertteýshi Marııam Haqshenas osy týraly óz oıyn bólisken. Onyń aıtýynsha, atalmysh aýrýdy emdeý úshin qabyldanatyn tıimdi sharalardyń biri gendi tıimdi tasymaldaý úshin ońtaılandyrylǵan rekombınantty vırýstyq vektorlardy óndirý bolyp tabylady.
Marııam Haqshenastyń aıtýynsha, «Retinitis Pigmentosa» aýrýyn emdeý úshin osy ádisti qoldaný arqyly osy genniń saý nusqasy bar vırýs jasaldy.
Eńbektiń nany tátti — Janadauir
Saıahatshylyq, týrızm salasy elimizdegi damyp kele jatqan salalardyń biri. Saıahatshylarǵa qyzmet kórsetý, standarttyq talaptarǵa saı gıgıenalyq tazalyqty ustana otyryp qyzmet kórsetý de asa mańyzdy. Ótken jyly aımaǵymyzǵa 70 myńdaı saıahatshy kelgen. Saıahatshylardyń árbireýi aımaǵymyzdaǵy qonaq úılerge qonady, ár jolǵy saıahatshylarǵa tizginshi, aspaz, aýdarmashy degen sııaqty eń keminde úsh adam erip júredi. Olar aýyldardaǵy adamdardan at minedi, kólik jaldaıdy. Osynyń barlyǵy da aımaǵymyzǵa kirip jatqan taza kiris dep eseptegen jón. Ótken jyldary aımaǵymyzǵa AQSh-tyń eks prezıdenti Tramptyń uly jáne ótken jyly Koreıanyń ataqty ártisi Jan Heg bastaǵan top kelip derekti fılm túsirdi. Osyndaı áıgili azamattarǵa as-taǵammen daıashylyq jasaǵan Indıra Kenjehanqyzy kóptiń alǵysyn alýda, dep jazady Baıan-Ólgeı aımaǵynyń «Janadauir» basylymy.
Mońǵolııalyq basylymnyń dereginshe, ol 20 jyl boıy aspazdyqty kásip etip, balasyn oqytyp er jetkizip, kásibin ashyp, aǵaıyn-týysyna qolǵabys jasap keledi. Qarapaıym, óz eńbeginiń sheberi Indıra ótken qysta batys bes aımaq arasyndaǵy aspazdar saıysynan birinshi oryn jeńip alyp marapattalǵan.
Indıra kóptegen qıynshylyqqa qaramastan osy salada taban aýdarmaı 20 jyl jumys istegen ýaqytynda árdaıym ózin jetildirgen.
«Memlekettiń baılyǵyn mújimeı tek óz eńbegin satyp bala-shaǵasyn asyrap júrgen jannyń bári eńbek maıtalmany degen ataqqa laıyq. Endeshe mamandyqtyń, kásiptiń bári jaqsy, adal astyń bári tátti», - dep túıindeıdi mońǵolııalyq BAQ.
