Shynaıy oqıǵa jelisimen: «111» teleserıal túsiriliminen reportaj
ALMATY. KAZINFORM – Almatyda «111» (Juz on bir) turmystyq zorlyq-zombylyq problemasyna arnalǵan jańa qazaqstandyq telehıkaıanyń túsirilimi júrip jatyr. Shytyrman oqıǵaǵa toly detektıvtik drama osy kúzde kórermenderdiń nazaryna usynylmaq. Túsirilim alańyna Kazinform agenttiginiń fototilshisi baryp, kadr syrtyndaǵy qyzyqty sátterdi túsirip qaıtty.
«111» – shynaıy oqıǵalarǵa negizdelgen turmystyq zorlyq-zombylyq taqyrybyna arnalǵan serıal. Birinshi serııasy «Jibek Joly» telearnasynda 7 qazanda shyǵady. Sıýjettiń basty keıipkeri - jas qorǵaýshy Aıjan Qambarova. Súıiktisimen qaıǵyly jaǵdaıda ajyrasqannan keıin ol áıelderdi zorlyq-zombylyqtan qorǵaý bólimshesiniń ınspektory bolady.
Keıipker qyzmet barysynda ártúrli qıyndyqtarǵa tap bolady. Oǵan turmystyq zorlyq-zombylyq qurbandaryna kómektesýge jáne qylmystyq tergeýge jıi qatysýǵa týra keledi. Aıjannyń bólimshesinde birneshe qyzmetker jumys isteıdi. Olardyń bári óz mıssııalaryn adal atqarady.
Teleserıaldyń tórt rejısseri bar. Osydan-aq jobanyń qanshalyqty aýqymdy ekenin baıqaýǵa bolady. Túsirilimge Beıbit Óner, Berik Jahanov, Modııar Abdýqadyrov jáne Evgenıı Palamarchýk syndy rejısserler jetekshilik etedi.
27 jastaǵy Modııar Abdýqadyrovtyń aıtýynsha, rejıssýradaǵy mundaı jan-jaqtylyq ár sahnanyń jasalýyna shyǵarmashylyq pen kreatıvti ıdeıa qosady.
«Bul meniń osy saladaǵy altynshy serııam. Men úshin osyndaı tájirbıeli mamandarymen bir komandada jumys isteý zor mártebe ári qyzyqty. Munda sapaly ónim alý úshin bir-birin tyńdap, ózara til tabysý mańyzdy. Bul úlken joba: 40 epızod, shynaıy ómirden alynǵan 20 túrli jaǵdaı. Stsenarıstermen elimizde ǵana emes, shetelde bolǵan shynaıy oqıǵalardy izdedik. Sondyqtan bul taqyrypty barynsha ashyp, kórermenge qyzyqty formatta usynýymyz kerek. Munda ár rejısserdiń róli óte mańyzdy. Odan ne shyǵatynyn kóremiz», – deıdi ol.
Osyndaı ózekti taqyrypta telehıkaıa túsirý – turmystyq zorlyq-zombylyq máselesine qoǵamnyń nazaryn aýdarý jáne oǵan degen kózqarasty ózgertý jolyndaǵy mańyzdy qadam.
Rejısserdiń aıtýynsha, fılm áıelderdi myqty bolýǵa, ózin qurmetteýge, kómek suraýdan uıalmaýǵa shaqyrady.
«Turmystyq zorlyq-zombylyq taqyryby tek qazaq qoǵamynda ǵana emes, búkil álemde ózekti bolǵandyqtan, kórermender bul serıaldy baǵalaıdy dep oılaımyn. Elimizde áıelder quqyǵyn qorǵaý maqsatynda túrli sharalar men zańdar qabyldandy. Serıal qoǵamǵa ózgeris ákelip, adamdardy osy máselege jańasha kózqaraspen qaraıdy dep senemin. Biz tek turmystyq zorlyq-zombylyq qurbandaryn ǵana emes, ártúrli jaqtan zorlyq-zombylyq kórsetkenderdi de kórsetemiz. Bizdiń serıal adamdarǵa zorlyq-zombylyqtyń zulymdyq ekenin jáne oǵan múldem jol berilmeıtinin túsinýge kómektesedi dep sengim keledi», - dedi Modııar Abdýqadyrov.
Serıal avtorlary túsirilim sapasyna úlken mán beredi – túsirilim alańynda erekshe atmosfera bar. Búkil protsess akterlerden, grımerlerden, assıstentterden jáne operatorlardan turatyn úlken toptyń jaqsy úılestirilgen jumysyn talap etedi. Árbir qatysýshy sahnalarǵa muqııat daıyndalady: akterler úzilis kezinde stsenarııdi qaıtalaıdy, operatorlar alańdy ártúrli qyrynan túsiredi, al rejısser túsirý protsesiniń barlyq kezeńin baqylaıdy.
Akter quramy ártúrliligimen tań qaldyrady. Túsirý alańynan tanymal akterlerdi de, debıýtanttardy da kezdestirýge bolady. Basty rólde Janel Serǵazına, ol Aıjan esimdi zańgerdiń obrazyn somdaıdy. Sonymen qatar, Erkebulan Daıyrov, Asan Májit, Ermek Shynbolatov, Jarqynaı Hanaıym, Aınur Bolat jáne taǵy basqalary oınaıdy.
«Bul meniń osyndaı aýqymdy jobadaǵy debıýtim. Men úshin úlken tájirıbe. Atalǵan serıalda men basty keıipker – tergeýshiniń qyzynyń rólin somdaımyn. Meniń keıipkerim qıynshylyqtardy, anasynyń qysymyn bastan keshiredi jáne ata-anasynyń ajyrasýy oǵan qıynǵa soǵady. Sondyqtan, moraldyq turǵydan qıyn, óıtkeni osy synaqtardyń bárin basynan ótkeretin adamnyń beınesine úırený kerek», - deıdi debıýtant Sabına Saılaýqyzy.
Serıal prodıýseri Janar Turpatova joba bastalar aldynda ashyq kastıng jarııalanǵanyn, ár óńirden kóptegen ótinim túskenin aıtty. Sondaı-aq, kóptegen akterdi rejısserler shaqyrǵan.
«Bul taqyrypty – turmystyq zorlyq-zombylyqpen kúresti barlyq ártister qoldady. Kórermender serıaldy baǵalaıdy dep senemin», - dedi ol.
Joba ıdeıasynyń avtory – bas prodıýser Anar Júnisova. Al, shyǵarmashylyq ıdeıalarynyń shynaıy júzege asýy úshin serıal jasaýshylar daǵdarys ortalyqtaryna baryp, zorlyq-zombylyqtyń naǵyz qurbandarymen áńgimelesti, mamandarmen jáne polıtsııa qyzmetkerlerimen keńesti.
Nelikten «111»
Fılmniń aty kezdeısoq tańdalǵan joq. 111 – otbasy, áıelder jáne balalardyń quqyqtaryn qorǵaý máseleleri boıynsha jan-jaqty kómek kórsetetin 111 qyzmetiniń táýlik boıy jumys isteıtin baılanys ortalyǵynyń nómiri.
«Biz serııanyń ataýy týraly uzaq oılanyp, ártúrli nusqalardy qarastyrdyq, biraq sońynda ony «111» dep atadyq. Bul turmystyq zorlyq-zombylyq qurbandary kómek suraı alatyn naqty qyzmet nómiri. Kez kelgen adam 111 nómirine habarlasyp, qajetti qoldaýdy ala alady. Bizdiń serıaldar arqyly adamdar osyndaı qyzmettiń bar ekenin bilip jáne otbasylyq- turmystyq máseleler boıynsha kómek suraýǵa yqpal etedi degen úmittemiz. Mundaı serıaldar, fılmder men medıa jobalar kórermenderdiń kózqarasyn ózgertip, mańyzdy máselelerdi sheshýge kómektesedi. Biz adamdardy qoryqpaýǵa, óz problemalaryn ashyq aıtýǵa jáne 111 nómirine habarlasýǵa shaqyramyz. Serıalda áıelder qaıda júginetinin bilý úshin daǵdarys ortalyqtarynyń jumysyn kórsetemiz. Kórshilik osyndaı jerler baryn bilmeýi múmkin. Sondyqtan bizdiń týyndymyz jol silteýge yqpal etpek», - dep túıindedi rejısser Modııar Abdýqadyrov.
