Shymkenttikter VIP nómirlerge 2 mlrd teńge jumsaǵan
ShYMKENT. KAZINFORM - VIP nómirler naryǵy rekord jasaýdy jalǵastyrýda. Bir jylda eldegi kólik ıeleri «krýtoı» nómirler úshin shamamen 16 mıllıard teńge jumsaǵan.
Úzdik úshtik:
- Almaty – 5 mlrd teńgege jýyq.
- Astana – shamamen 2,5 mlrd teńge.
- Shymkent – 2 mlrd teńge.
Nómirlerdiń quny olardaǵy sandar men áripterdiń biregeıligine tikeleı baılanysty:
- 010, 020, … 707 sekildi qarapaıym kombınatsııalar 57 AEK turady.
- Sol sandar, biraq birdeı áriptermen, mysaly, A010AA qymbatyraq - 114 AEK.
- Tanymal «dóńgelek» sandar (100, 111, … 999) 137 AEK, al qaıtalanatyn áripteri bolsa 194 AEK.
- 001, 002, … 777 sekildi sırek kezdesetin kombınatsııalar joǵary suranysqa ıe. Olardyń baǵasy 228 AEK -den bastalady.
- Eń qymbaty - sırek kombınatsııaly birdeı áripteri bar nómirler. Olardyń quny 285 AEK-ke deıin jetedi.
Sondaı-aq, eń qymbat nómirler 001-den 009-ǵa deıingi sandarǵa tıeseli jáne olardyń qatarynda 777 nómiri de bar. Mundaı eksklıýzıvti kombınatsııalardyń quny 1 mıllıon 120 myń teńgege deıin barady.
Salystyrmaly túrde alsaq, qarapaıym nómirdi nebári 2,8 AEK – shamamen 10 myń teńgege satyp alýǵa bolady.
Sońǵy eki jylda Shymkentte eksklıýzıvti kombınatsııasy bar nómirlerge qyzyǵýshylyq aıtarlyqtaı artqan. Kólik ıeleri arasynda qaıtalanatyn sandary bar nemese biregeı kombınatsııaly sandary kóp nómirler úlken suranysqa ıe.
010, 020, 030, 040, 050, 060, 070, 077, 080, 090, 707 kombınatsııalary bar sandar:
- 2023 jyly – 1941 nómer shyqsa, 2024 jyly 2481 nómer qoldanysqa berilgen, ósim: +27,8 paıyz.
Eger mundaı sandar birdeı áripterdi qamtysa (mysaly, A020AA):
- 2023 jyly nebári 13, 2024 jyly 26 nómer kólik ıelerine tabystalǵan, ósim: +100 paıyzdy quraıdy.
«Dóńgelek» sandar (100, 111, 200, 222, 300, 333, 400, 444, 500, 555, 600, 666, 700, 800, 888, 900, 999):
- 2023 jyly – 583 nómer shyqqan bolsa, 2024 jyly 639 nómer qoldanysqa engen, ósim: +9,6 paıyz.
Birdeı áriptermen (mysaly, B111BB):
- 2023 jyly – 33, 2024 jyly 37 nómer tirkeýge alynǵan, ósim: +12,1 paıyzdy qurap otyr.
Biregeı kombınatsııalar (001, 002, 003, 004, 005, 006, 007, 008, 009, 777):
- 2023 jyly - 359, 2024 jyly 482 nómer shyqqan, ósim: +34,3 paıyz.
— Qazaqstandaǵy kez kelgen kólik ıesi sandar men áripterdiń ádemi úılesimi bar «suranysy joǵary» dep atalatyn nómirdi tańdaı alady. Qajetti nómir memlekettik korporatsııanyń fılıalynda bolmaǵan jaǵdaıda, oǵan memlekettik korporatsııa arqyly nemese onlaın, elektrondy úkimet portaly arqyly tapsyrys berýge bolady. Qoljetimdi nómirler týraly aqparatty tikeleı Halyqqa qyzmet kórsetý ortalyǵynda kórýge nemese onlaın suraýǵa múmkindik qarastyrylǵan. Tańdalǵan nómirmen avtokólikti tirkeý nómirdiń ózi shyǵarylǵannan keıin ǵana júzege asyrylady. Ázirge mundaı nómirlerdi alý erejelerinde eshqandaı ózgerister kútilip otyrǵan joq, - delingen QR ІІM túsindirmesinde.
Aıta keteıik, budan buryn merekede áıelderdi syılyqsyz qaldyrǵan shymkenttik eki jigit qamaýǵa alynǵanyn jazǵan bolatynbyz.