Shymkenttikter tarıhı matchty úlken ekrandar arqyly kóre alady

ShYMKENT. KAZINFORM — Búgin UEFA Chempıondar lıgasynyń toptyq kezeńinde erekshe tarıhı oqıǵa oryn almaq.

Almatynyń «Qaırat» fýtbol klýby álemdik fýtbol alyptarynyń biri — Ispanııanyń «Real Madrıd» komandasymen jasyl alańda kezdesedi. Fýtbolsúıer qaýym asyǵa kútken kezdesý Shymkent qalasynda da kórsetiledi. Jankúıerlerge yńǵaıly jaǵdaı jasaý maqsatynda qala ákimdigi tikeleı kórsetilimdi úlken ekrandar arqyly uıymdastyryp jatyr. Matchty shymkenttikter men qala qonaqtary qalalyq «Jastar ortalyǵy» ǵımaratynda jáne «Astana» alańynda tamashalaı alady.

— Bul kezdesý — elimizdiń sport tarıhyndaǵy aıtýly sátterdiń biri. Sizderdi álemdik fýtbol juldyzdarynyń oıynyna kýá bolýǵa jáne «Qaırat» komandasyna jankúıer bolýǵa shaqyramyz, — delingen qala ákimdiginiń baspasóz qyzmeti taratqan aqparatta.

Álemdik fýtbol juldyzdarynyń ónerin kózben kórýge múmkindik beretin match búgin saǵat 21:45–te bastalady.

Aıta keteıik, budan buryn Almatyda stadıonnan tegin avtobýstar júretindigin jazǵan bolatynbyz.