Shymkenttikter ekologııaǵa qatysty qandaı shaǵymdar qaldyrady

ShYMKENT. KAZINFORM - Shymkentte ekologııalyq zańbuzýshylyqtar azaımaı tur.

Shymkent qalasy boıynsha ekologııa departamenti basshysynyń mindetin atqarýshy Sabyr Balybektiń sózine súıensek, turǵyndardyń ótinishteri kóbinese turǵyn úıler arasynda mal ustaý, kórshilerdiń turmystyq qaldyqtardy órteýi, monsha men temir qabyldaý pýnkteri, túngi mezgilde qaladan shyǵatyn jaǵymsyz ıis, óndiris oryndarynyń aýa men sýdy shamadan tys lastaýy, kóshedegi jáne konteınerdegi qoqystardyń ýaqtyly alynbaýy, káriz júıelerinen shyqqan ıis jáne ruqsatsyz qoqys ornalastyrý máselelerine qatysty túsedi. 

Búginde aryz shaǵymdar kásipkerlik sýbektisine jatpaıtyndyqtan, departament mamandary túsindirý jumystaryn júrgizip keledi.

Jalpy, ekologııa departamenti 2025 jyldyń alǵashqy jartyjyldyǵynda 19 tekserý júrgizgen. Onyń ishinde 6 profılaktıkalyq, 2 sáıkestik jáne 11 jospardan tys baqylaý bolǵan.

Nátıjesinde 19 nusqama berilip, 34 ákimshilik is qozǵalǵan. Jalpy somasy 23,5 mln teńge kóleminde aıyppul salyndy.

Eleýli isterdiń qatarynda úsh zańdy tulǵaǵa «Jerdi búldirý» boıynsha is qozǵalyp, qylmystyq quram anyqtalmaǵandyqtan materıaldar Ekologııa departamentine qaıtarylǵan. Bul jaǵdaılar boıynsha 8 mln teńgeden astam aıyppul salynǵan. Sondaı-aq tórt jeke tulǵa jer qoınaýyn zańsyz paıdalanǵany úshin 33 myń teńge aıyppul tólegen. Ál-Farabı aýdany prokýratýrasynyń usynysy negizinde aýdan aýmaǵyndaǵy sanıtarlyq tazalaý jumystaryna jaýapty laýazymdy tulǵaǵa QR ákimshilik quqyq buzýshylyq týraly kodeksiniń 324 babynyń 1 tarmaǵymen aıyppul salynsa, kólik prokýratýrasynyń qaýlysymen «Aeraport Shymkent» AQ-na 553 myń teńge kóleminde ákimshilik jaza qoldanylǵan.

Sondaı-aq, sot sheshimimen birneshe iri óndiris ornynyń qyzmeti ýaqytsha toqtatyldy. «SınıÝanSTILЬ» JShS tazalaý qurylǵysyz jumys istegeni úshin jaýapqa tartylsa, «HILL» JShS-ǵa 1,96 mln teńge kóleminde aıyppul salyndy jáne kásiporyn qyzmeti bir aıǵa toqtatyldy. «Germes-B.E.» JShS 786,4 myń teńge kóleminde aıyppulmen úsh aıǵa, al JK «Habıbýlla Nematýlla» 393,2 myń teńge kólemindegi aıyppulmen bir aıǵa jabylǵan.

- «Qazgıdromet» mekemesiniń monıtorıng nátıjesinde 2025 jyldyń 1 jartyjyldyǵy boıynsha atmosferadaǵy aýanyń lastanýy deńgeıi kóterińki bolyp baǵalanady. Munyń sebebi - byltyǵy jyly «Ordabasy» ındýstrıaldy aımaqtaǵy kúkirt shıkizatyn saqtaý qoımasynda úlken órt oryn alǵan. Sonyń saldarynan lastaný deńgeıi kóterilgen. Qaladaǵy atmosferalyq aýanyń lastanýynyń negizgi sebepterine - óndiris oryndarynan, avtokólikterden jáne jylytý maqsatynda jeke turǵyn úılerden shyqqan shyǵaryndylar jatady, -dedi Sabyr Balybek.

Aıta keteıik, budan buryn Shymkentte ákimdiktiń 54 qyzmetkeri qumar oıynǵa boı aldyrǵanyn jazǵan bolatynbyz.