Shymkenttik emshi qınaǵan asyrandy balalardyń qazir qaıda ekeni belgili boldy
ShYMKENT. KAZINFORM. Shymkentte jergilikti emshi asyrap alyp, ábden qorlaǵan balalarǵa qatysty sot sheshimi shyqty.
Qalalyq sottyń málimetinshe, kámeletke tolmaǵandardyń isteri jónindegi mamandandyrylǵan aýdanaralyq sotynda U.Smanov pen jubaıyna bir ul men bir qyzdy asyrap alýǵa berý týraly 2021 jáne 2023 jyly shyqqan sot sheshiminiń kúshi joıylǵan. 2 shildede kámelet jasyna tolmaǵan eki balaǵa qatysty sheshim shyqty. Nátıjesinde asyrap alýǵa berilgen jasóspirim ul Shymkenttegi balalar úıiniń, al búldirshin qyz qaladaǵy bóbekter úıiniń tárbıesine berildi.
Atalǵan sot sheshimi zańdy kúshine áli engen joq.
Qalalyq bilim basqarmasynyń málimetinshe, emshige qamqorlyqqa berilgen tórt balanyń ishinde 2019 jyly týǵan ul bala Shymkenttegi balalar úıiniń qamqorlyǵyna berilgen. 2021 jyly dúnıege kelgen egiz ul men qyz Astana qalasynyń mamandandyrylǵan bóbekter úıine jetkizilgen. 2020 jyly týǵan ul bala Shymkenttegi bóbekter úıine tapsyrylǵan.
Buǵan deıin 6 balany qorlaǵan emshiniń áıeliniń ústinen qylmystyq is qozǵalyp, tergelip jatqany belgili boldy.
Shymkentte jergilikti emshiniń 6 balany asyrap alyp, olarǵa ıt pen mysyqtyń etin bergenin, úsh jyldan beri azaptap kelgenin jazǵan bolatynbyz. Keıinirek emshi týraly tyń derek shyqty.
Emshi isinen soń bilim salasynyń birqatar qyzmetkeri jazalandy. Sonymen qatar qalalyq densaýlyq saqtaý basqarmasyndaǵylar balalardyń qazirgi jaǵdaıy týraly aıtyp berdi.
Budan ózge Kazinform redaktsııasyna emshi asyrap alǵan balalar týraly tyń derek kelip tústi. Ondaǵy málimette búldirshinderdiń biri atalǵan otbasyǵa nebári 1,5 aılyǵynda qamqorlyqqa berilgeni kórsetilgen. Qamqorlyqqa berilgen balalardyń arasynda úsh aılyq egizder de bar.
Balalardyń biriniń ájesi Óskemende turatyny belgili boldy. Ol Kazinform tilshisine bergen suhbatynda jıen nemeresi asyraýǵa qalaı berilgenin aıtyp berdi.
Astana qalalyq Bilim basqarmasyna emshiniń qamqorlyǵyna berilgen egiz balalar elordaǵa qaıtarylatynyn aıtty.
Qoǵamdyq rezonans týdyrǵan is sotqa kelip tústi.
Kóp uzamaı asyrap alǵan balalaryn qorlady degen aıyp taǵylyp otyrǵan emshiniń isin qaraıtyn sýdıa belgili boldy.
ІІM Kazinform agenttiginiń resmı saýalyna bergen jaýabynda asyrap alǵan alty balany azaptady degen kúdikke ilingen emshiniń mamandandyrylǵan aýrýhanada jatqanyn aıtty.
Al Oqý-aǵartý mınıstrligi bala quqyqtaryn qorǵaý komıteti shymkenttik emshi aqyl-esi saý degen qujat ótkizgenin málimdedi.
Asyrap alǵan balalaryn qorlaǵan emshiniń 31 jyl buryn adam óltirgeni rastaldy.
Emshiniń advokatynyń aıtýynsha, ol psıhıkalyq aýytqýyna baılanysty 1995 jyldan beri esepte turǵan. Oǵan shızofrenııa dıagnozy qoıylǵan.
U.Smanovqa qatysty is Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Sot aktisimen emshi psıhıkalyq aýytqýyna baılanysty esepte turǵandyqtan jazadan qutyldy. Oǵan mamandandyrylǵan úlgidegi psıhıatrııalyq statsıonarda májbúrlep emdeý taǵaıyndaldy.
