Shymkenttegi asyrandy balalar oqıǵasy: bir balanyń ájesi Óskemende turady
ÓSKEMEN. KAZINFORM – Qazaqstannyń ár qalasynan alty balany asyrap alǵan shymkenttik emshige qatysty tyń derekter anyqtalyp jatyr. Balalardyń biriniń ájesi Óskemende turady. Kazinform tilshisi 65 jastaǵy Natalıa Ýstınovamen jolyǵyp, jıen nemeresiniń asyraýǵa qalaı berilgenin surap kórdi.
«Qyzym Olga aspaz bolyp jumys isteıtin. Birde Buqtyrmadaǵy «Chaıka» demalys bazasyna jumysqa ornalasyp, demalýshylarǵa tamaq pisirip júrdi. Sonda slesar bolyp isteıtin Qaıratpen tanysty. Áńgimesi jarasyp, kóńil qosqan ekeýi birge turdy. Biraq zańdy nekege otyrǵan joq», - deıdi Natalıa Ýstınova.
2019 jyldyń jazynda Olga jaryq dúnıege sábı alyp keldi. Ol kezde jasy 39-da bolǵan. Buǵan deıin turmysqa shyqpaǵan, bala súıip kórmegen. Ulynyń esimin Rýslan dep qoıady.
«Balaly bolǵandaryna ákesi qýanǵan joq. Kerisinshe olardy tastap ketti. Qyzym depressııaǵa túsip, sary ýaıymǵa salyndy. Іshimdik iship júrdi. Ózim de, kúıeýim de oǵan qoldaý bildirip, demeý bolýǵa tyrystyq. Bankten 3 mln teńge nesıe alyp, eski úıimizdi jóndettik te, ekeýin kirgizip aldyq. Bala úshin bir bólmeni arnaıy jabdyqtadyq. Olga sabasyna túsip, qalypqa kele bastady. Biraq 2021 jyly órshigen koronavırýs atty kesel qyzymdy aınalyp ótpedi. Qatty aýyrǵan ol 14 kún boıy jansaqtaý bóliminde jatyp, esh ońalmaı qaıtys boldy. Nemeremizdi atasymen óz qamqorlyǵymyzǵa aldyq», - dep sózin sabaqtady ol.
«Jut jeti aǵaıyndy» degendeı, bul otbasyna túsken taǵdyr taýqymeti osymen támamdalmaǵan. Jarty jyldan keıin ınsýlt alǵan atasy quryǵy uzyn ajaldyń kemesine mingen.
«Tireýimnen aıyrylyp, jalǵyz qaldym. Nesıe tóleý úshin qaıta jumysqa shyǵyp, Rýslandy Óskemendegi sábıler úıine ótkizýge májbúr boldym. Qyzym sııaqty ózim de aspazbyn. Basynda ýaqytsha dep oıladym. Biraq qaryzdan qutyla almaı, kúnder, aılar syrǵyp óte berdi. Nemereme únemi baryp, qal-jaǵdaıyn bilip turdym», - deıdi Natalıa Ýstınova.
2023 jyldyń kúzinde Rýslandy shymkenttik otbasy asyrap alýǵa nıetti ekendigin estigen. Kimder ekenin zerttep, áleýmettik jeliden er adamnyń emshilikpen aınalysatynyn kórgen.
«Rýslan ony birden «ákelep» ketti. Kóre sala «áke, áke» dep júgire jóneldi balapan... Kirshiksiz taza júregi aramdyqty qaıdan sezsin... Ózin baıypty ustap, balany basynan sıpap, erkeletip turǵan álgi adamdy kórgende men de senip qaldym. Sóıtip, sol jyldyń 16 qazanynda ol Rýslan men Aleksandr esimdi taǵy bir balany Óskemennen Shymkentke alyp ketti. 6 balany asyraǵanyn keıin myna sumdyqty estigende baryp bildik qoı», - deıdi.
2024 jyldyń aqpanynda sol alty balanyń úlkeni ózderiniń múshkil hálderin aıtyp kómek suraǵan soń tekserý júrgizilip, emshige qatysty qylmystyq is qozǵalǵan. Demek, Rýslan osy otbasynda 4 aı bolǵan. Qazir ol Shymkenttegi kámeletke tolmaǵandardy beıimdeý ortalyǵynda.
«Jaýyzdyń nemereme jáne basqa balalarǵa qandaı qatigezdik kórsetkenin estigende júregim qars aıyryldy. Bul – naǵyz aıýandyq! Janýar ekesh janýar da balasyna olaı istemeıdi. Al sol adamnyń ózin ákedeı kórip turǵan kishkentaı perishtelerge qııanat jasaýyn esh aqtaýǵa bolmaıdy. Ony qatań jazalaý kerek!» - deıdi Natalıa Ýstınova.
Ájesi nemeresiniń Óskemenge qaıtyp kelýin tileıdi. Qaryzdan áli qutylmaǵan. Jasy 65-ke kelse de jumys istep, nesıe tólep otyrǵanyn aıtady.
«Rýslandy osyndaǵy balalar úıine aldyrsa apta saıyn baryp turatyn edim. Oǵan durys kútim jasalyp jatqanyn qadaǵalap, kerek-jaraǵyn jetkizip otyramyn. Jasym da birazǵa keldi. Nesıeden qutyla almaı turǵanym bolmasa nemeremdi ózim-aq baǵýshy edim. Mine, bizdiń oqıǵa osyndaı», - dep aýyr kúrsingen zeınetker sózin aıaqtady.
Kazinform tilshisi Natalıa Ýstınova aıtqan Óskemendegi sábıler úıine de baryp kórdi. Biraq ondaǵy kúzetshi mekeme dırektory Fatıhova Saltanat Erbolatqyzynyń ornynda joq ekendigin aıtyp, qaqpa syrtynan ary qaraı ótkizbedi.
Eske salsaq, buǵan deıin Shymkentte jergilikti tanymal emshiniń 6 balany asyrap alyp, olarǵa durys qaramaǵany, ıt pen mysyq etin bergeni, azaptap kelgeni jazylǵan edi. Keıinirek emshi týraly tyń derek shyqty.
Sondaı-aq osy jaǵdaıǵa qatysty bilim salasynyń birqatar qyzmetkeri jazalanǵany habarlandy.
