Shymkenttegi 17 bazar nege jabyldy
ShYMKENT. KAZINFORM - Ótken jyly Shymkenttegi keıbir bazarlar jańǵyrtýdan ótti, dep habarlaıdy Kazinform agenttiginiń tilshisi.
Memlekettik kirister departamentiniń málimetine súıensek, Shymkenttegi bazarlarda jalǵa alýshy retinde jumys isteıtin 8807 jeke kásipker tirkelgen.
Al jalpy Shymkentte 19 bazar bar: «Avto Nur», «Alash», «Samal», «Aına», «Ortalyq joǵarǵy bazar», «Darhan», «Nazym apa», «Akbar», «Tulpar», «Sandybaev» mal bazary, «Jabyq bazary», «Jańa qala», «Jibek joly», «Jumanov avtobazary», «Barys», «Bereke», «Kóktem», «Nur-Saıram», «Pıoner». Onyń jeteýi ámbebap bolsa, 12-si mamandandyrylǵan.
– Buǵan deıin Shymkentte 36 bazar bolsa, onyń 19-y ámbebap, 17-si mamandandyrylǵan edi. Jańǵyrtý barysynda «Eýrazııa», «Yntyq ata» mal bazary, «Altyn Orda», «Ásel», «ıÝj trans», «Benefıt», «Aızara», «Arǵymaq» sııaqty 8 bazar jabyldy. «Bekjan», «Kómesh bulaq», «Alataý», «Argon», «Jan uıa», «Seıhýn», «Nurly jol», «Dáýrehanova», «Zııash ana» sııaqty 10 bazar jáne «Yntyq ata» kók bazary maqsatyn ózgertip, saýda qatarlaryna aınaldy. Sondaı-aq, «Pıoner» jumys istep turǵan bazarlar qataryna qosyldy, - dep málimdedi Ulttyq statıstıka bıýrosynyń mamandary.
2018 jyly Shymkent respýblıkalyq mańyzy bar qala mártebesin aldy. Bul bazarlardyń jaı-kúıi men ondaǵy saýdany uıymdastyrýǵa qatysty talaptardy kúsheıtti.
Qazaqstan Respýblıkasy Saýda jáne ıntegratsııa mınıstrligimen bekitilgen jol kartasy aıasynda «Alash», «Samal», «Jańa qala», «Ortalyq joǵarǵy bazar», «Avto Nur», «Jabyq bazary» jáne «Nazym apa» sııaqty 7 bazardy jańǵyrtý jumystary josparǵa endi.
2024 jyldyń jeltoqsanynda «Alash», «Samal» jáne «Jańa qala» bazarlaryn qaıta qurý jáne jańǵyrtý jumystary aıaqtaldy. Al, «Avto Nur», «Ortalyq ústińgi bazar», «Jabyq bazary» jáne «Nazym apa» bazarlaryn barlyq qajetti talaptarǵa saı etip zamanaýı saýda alańdaryna aınaldyrý bıylǵy jyly iske aspaq.
– Bazarlardy jańǵyrtý jumystary kezeń-kezeńimen júrgizilýde. Jóndeý jumystarynyń nátıjesinde jańa saýda oryndary ashylyp, qosymsha jumys oryndary paıda bolýda. Stıhııalyq saýdamen aınalysatyndar sany aıtarlyqtaı qysqardy,-deıdi Shymkent qalalyq kásipkerlik basqarmasy basshysynyń orynbasary Úsen Isaev.
Saýda qatarlaryn jańǵyrtý - ýaqyt pen qomaqty ınvestıtsııany qajet etedi. Sondaı-aq, qaıta qurý jumystary úshin bazarlardy jabý jumyssyzdyqtyń kúrt ósýine alyp keledi jáne jalǵa alýshylardy da qarajatsyz qaldyrýy múmkin. Al jumys aıaqtalǵannan keıin nysan ıeleri ınvestıtsııasyn qaıtarý úshin jaldaý aqysyn kóterýge májbúr bolady. Bul taýar baǵasynyń ósýine ákeledi. Sondyqtan bazarlardy kezeń-kezeńimen jańǵyrtý tıimdi bolyp otyr.
— «Avto Nur», «Ortalyq ústińgi bazar» jáne basqa da bazarlardaǵy basty másele – qarjy tapshylyǵy jáne jańǵyrtý kezeńinde jeke kásipkerlerdi saýda oryndarymen qamtamasyz etý qajettiligi. Shymkent respýblıkalyq mańyzy bar qala mártebesine ıe bolǵandyqtan, bazarlarǵa qaıta qurý jumystaryn júrgizý úshin sýbsıdııalanǵan paıyzdyq mólsherleme qarastylylmaǵan. Barlyq jumystar jeke qarajat esebinen júrgiziledi, - dep túsindirdi Úsen Isaev.
Qurylys materıaldarynyń turǵyn úılerdiń mańynda jáne jol boıynda satylýy qalada kópten beri sheshilmeı kele jatqan máselelerdiń biri. Klıentterdi joǵaltyp alýdan qorqatyn keıbir satýshylardyń qarsylyǵyna qaramastan bul jaǵdaıdy retteý isi qolǵa alyna bastady. Jergilikti bılik bul jaı ǵana turǵyndarǵa jasalǵan yńǵaılylyq qana emes, qaladaǵy qaýipsizdik pen tártipke baǵyttalǵan qadam ekenin málimdedi.
– Qurylys bazarlaryn qala syrtyna shyǵarý úshin tórt qurylys saýda ortalyǵy quryldy: «Soltústik-1» (6 ga, Qarataý aýdany), «Soltústik-2» (7,6 ga, Abaı aýdany), «Yntymaq» (77 ga, Abaı aýdany) jáne «Qursaı» (29 ga, Turan aýdany). 2024 jyldyń shildesinen bastap zańsyz saýda núktelerinde qurylys materıaldaryn satýshylardy osy arnaıy bólingen aýmaqtarǵa kóshirý jumystary bastaldy, - dep málimdedi kásipkerlik basqarmasynan.
Shymkent kóp jyldan beri jaıaý júrginshiler jolyndaǵy stıhııalyq saýdamen kúresip keledi. Halyq kóp júretin aımaq satýshylardyń súıikti mekeni ekeni anyq. Retsiz saýda jasaýshylarǵa búginge deıin birneshe ret eskertý berilgen. Aıyppul da salynyp jatyr. Biraq polıtsııa ketisimen saýda qaıta qyzady.
– 10 kún ishinde Ál-Farabı aýdany ákimi apparatynyń jáne aýdandyq ishki ister bóliminiń qyzmetkerlerimen birlesip Áıteke bı kóshesiniń boıynda ruqsat etilmegen oryndarda saýda jasaǵany úshin jáne abattandyrý erejelerin buzǵan 4 kásipkerlik sýbektisine aıyppul salyndy. Aıyppuldyń jalpy somasy – 160 500 teńge, qarajat tolyǵymen óndirildi. Reıdtik is-sharalar josparly túrde jalǵasatyn bolady, - delingen Shymkent qalalyq Polıtsııa departamentiniń habarlamasynda.
Osylaısha, búginde megapolıste ruqsat etilmegen saýda máselesi ózekti bolyp tur. Satýshylar saýda ornyn jalǵa alýdan jáne salyq tóleýden qashatyndyqtan retsiz saýda jýyq arada rettelmesi anyq. Alaıda, qala ákimdigi saýda ıeleri bazarlarǵa kóshetin bolsa, olardan qosymsha tólem alynbaıtynyn málimdedi. Bul baǵytta ákimdik pen bazar ıeleri arasynda kelisim de jasalǵan.
– Ruqsat etilmegen oryndardaǵy saýdany retteý sharasy retinde saýda oryndary 1 jyldan 5 jylǵa deıingi merzimge konkýrstyq negizde tegin beriledi, - dep atap ótti Shymkent qalasy ákimdiginiń baspasóz qyzmeti.
Almaty oblysy Qaskeleń qalasyndaǵy bazardan órt shyqqanyn jazǵan bolatynbyz.