Shymkentte jańa órt sóndirý deposy ashyldy
ASTANA. KAZINFORM – Qutqarýshy kúni qarsańynda Shymkentte jańa órt sóndirý deposy ashyldy. Bul týraly Shymkent qalasy TJD baspasóz qyzmeti habarlady.
Saltanatty is-sharaǵa QR Tótenshe jaǵdaılar vıtse-mınıstri Erlan Nurpeıisov, Shymkent qalasy ákiminiń orynbasary Aıdyn Kárimov, azamattyq qorǵaý organdarynyń ardagerleri jáne basqa da qurmetti qonaqtar qatysty.
Jańa órt sóndirý deposy Saıram turǵyn alabynda salyndy, ol 5 turǵyn alaby turǵyndarynyń órt qaýipsizdigin qamtamasyz etedi.
Jergilikti bıýdjet esebinen salynyp jatqan bul órt sóndirý deposy tórt shyǵýǵa arnalǵan. Eki qabatty órt sóndirý deposynda órt sóndirýshiler úshin barlyq jaǵdaı jasalǵan: oqý synyby, demalys, jatyn, as bólmesi, sport jáne májilis zaly, tehnıkalyq úı-jaılar, jeke quramnyń kásibı daıarlyǵyn arttyrý úshin oqý-jattyǵý munarasy jáne 100 metrlik kedergileri bar jolaq qarastyrylǵan.
Jańa órt sóndirý deposynda 50 órt sóndirýshi qyzmet atqaratyn bolady. Atalǵan órt sóndirý bólimi zamanaýı órt sóndirý tehnıkalarymen qamtamasyz etilgen. Jańa órt sóndirý deposy órt sóndirýshilerdiń qyzmet atqarý jáne órt qaýipsizdigin qamtamasyz etý jónindegi jumystyń tıimdiligin arttyrýǵa múmkindik beredi.
Qazirgi tańda úshinshi megapolısti órt qaýipsizdigimen 10 órt sóndirý bólimi qamtamasyz etedi. Qala turǵyndarynyń qaýipsizdigin arttyrý maqsatynda jergilikti bıýdjet esebinen Turan, Sáýle, Bozaryq shaǵyn aýdandarynda, Eltaı, Jańatalap turǵyn alaptarynda jańa órt sóndirý deposynyń qurylysy júrgizilip jatyr.
