Shymkentte jańa Fosforshylar mádenıet saraıynyń qurylysy bastaldy
ShYMKENT. KAZINFORM — Shymkentte jańa «Fosforshylar mádenıet saraıy» ǵımaratynyń qurylysy bastaldy.
Búgin qala ákimi Ǵabıt Syzdyqbekov pen «Sábı» qaıyrymdylyq qorynyń negizin qalaýshylar – ekolog Ásel Tasmaǵambetova jáne kásipker Keńes Raqyshev mańyzdy nysannyń qurylysy bastalǵan jerge kapsýla salý rásimine qatysty.
Qalanyń mádenı ómirinde erekshe oryn alatyn bul ortalyq 1980 jyly paıdalanýǵa berilgen. Alaıda sońǵy jyldary ǵımarat qaraýsyz qalyp, 2023 jyly kommýnaldyq menshikke ótti. Sarapshylar zertteý júrgize kele nysandy buzý qajettigin anyqtady. Osyǵan baılanysty Shymkent qalasy ákimdigi «Sábı» qorynyń qoldaýymen saraıdy buzyp, ornyna jańa mádenıet saraıyn salý týraly sheshim qabyldady.
Qala ákimi qatysýshylardy mańyzy zor qurylystyń bastalýymen quttyqtap, «Fosforshylar mádenıet saraıy» uzaq ýaqyt boıy qalanyń mádenı ortalyǵy bolǵanyn atap ótti. Mamandar tarapynan júrgizilgen zertteý jumystary negizinde qurylysty qaıta jańǵyrtýǵa sheshim qabyldanyp, bul bastamaǵa «Sábı» qorynyń negizin qalaýshylar qoldaý kórsetti.
– Shymkenttiń baı tarıhy men biregeı mádenı murasy bar. Qalada ekonomıkalyq ósýimge, ınfraqurylymdy damytýǵa jáne turǵyndardyń ómir súrý sapasyn jaqsartýǵa erekshe nazar aýdarylyp, megapolıs jalpy barlyq baǵyttar boıynsha qarqyndy damyp keledi. Bul nysannyń qurylysy bolashaqqa jasalǵan mańyzdy ınvestıtsııa bolmaq. Jańa mádenıet saraıy qalanyń damýyna serpin beretin jańa mádenı ortalyqqa aınalady, – dedi Ǵ.Syzdyqbekov.
«Sábı» qory 23 jyldan beri medıtsına, bilim jáne mádenıet salalarynda keshendi zertteýlerge negizdelgen jobalardy júıeli túrde qoldap keledi. Shymkenttegi mańyzdy nysandy qaıta jańǵyrtpas buryn, qor «Shymkent jáne «Fosforshylar mádenıet saraıy»: dástúr, modern jáne damý núkteleri» atty zertteý júrgizip, qala turǵyndarynyń áleýmettik daǵdylardy damytý jáne urpaqtar sabaqtastyǵyn qamtamasyz etý qajettiligin anyqtady.
– Jańa “Fosforshylar mádenıet saraıy” – Shymkenttiń mádenı damýynyń jańa kezeńi. Bul tek jańa daǵdylardy meńgerýge múmkindik beretin bilim berý ortalyǵy ǵana emes, sonymen qatar, ár jastaǵy turǵyndardy biriktiretin qoǵamdyq keńistik bolady. Damý tujyrymdamasynda urpaqtar arasyndaǵy mádenı baılanysty nyǵaıtý men dástúrlerdi saqtaýǵa erekshe mán berdik, – dedi Ásel Tasmaǵambetova.
Jańa mádenıet saraıy birneshe baǵytty qamtıtyn kópsalaly ortalyq bolmaq. Munda IT-hab, kreatıvti hab jáne qoǵamdyq bastamalar haby jumys isteıdi. Qala turǵyndary úshin kreatıvti ındýstrııa alańdary, sýretshiler sheberhanasy, kórme zaly, amfıteatr, kovorkıng, keńse bólmeleri, forým alańy, sán kórsetilimine arnalǵan transformer-sahna, bıznes-ınkýbator, foto jáne vıdeostýdııa, dybys jazý stýdııasy, podkast alańy, konferents-zal, sondaı-aq, ekologııalyq bastamalar men ata-analar klýbtary sekildi qalalyq qaýymdastyqtardyń fılıaldary qoljetimdi bolady.
Sondaı-aq, bolashaqqa qajetti daǵdylardy damytýǵa erekshe kóńil bólinedi. Atap aıtqanda, IT-modeldeý jáne robototehnıka, turmystyq sharýashylyq, rýnıkalyq jazý, dombyra tartý, shahmat, basseın, úlken tennıs, fýtbol, kúres, kórkem gımnastıka, jattyǵý zaly men bı sabaqtary uıymdastyrylady.
«Sábı» qorynyń tapsyrysy boıynsha jańa mádenıet saraıynyń dızaıny ázirlendi. Jobada Shymkentke tán tarıhı jáne zamanaýı elementter úılestiriledi. Jańǵyrtý josparyna sáıkes, nysan mańyndaǵy aýmaq ta keshendi túrde abattandyrylady. Munda saıabaq alańdary, alleıalar, sýburqaqtar jáne zamanaýı balalar alańdary salynyp, qala turǵyndary men qonaqtary úshin jaıly keńistik jasalady.
Aıta keteıik, Shymkentte SOS batyrmalary kóbeıdi.