Shymkentte tanymal kofe brendin zańsyz paıdalanǵan top ustaldy
ShYMKENT. KAZINFORM - Ádilet departamenti men polıtsııa departamentiniń birlesken is-sharasy barysynda tanymal MacCoffee brendi ónimin zańsyz qaıtalaǵan 3300-den astam erigish kofe qaptamasy tárkilendi.
Qyzmetkerler tirkelgen taýarlyq belgilerdi zańsyz paıdalanýdyń jolyn kesýge baǵyttalǵan jedel-profılaktıkalyq is-shara aıasynda Shymkent qalasyndaǵy qoıma úı-jaılary men saýda núktelerin tekserdi. Buǵan sebep – óz óniminiń qoldan jasalǵanyn anyqtaǵan MacCoffee kompanııasynyń resmı ótinishi boldy.
— Reıdter nátıjesinde birneshe bazar men qoımalarda túpnusqa MacCoffee ónimin syrtqy túrimen qaıtalaǵan qoldan jasalǵan taýardyń satylý derekteri anyqtaldy. Barlyǵy 264 myń teńge somasyna 3300-den astam ónim tárkilendi, — dedi qalalyq Ádilet departamenti bóliminiń basshysy Muhtar Abdezov.
Onyń aıtýynsha, kontrafaktili ónimniń qaptamasy sapasyz bolǵan, óndirýshi týraly málimet kórsetilmegen ári shyǵý tegi beımálim bolyp shyqqan.
Taýarlyq belgini zańsyz paıdalanǵany úshin quqyqbuzýshylarǵa 30 aılyq eseptik kórsetkish kóleminde aıyppul salynyp, tárkilengen barlyq ónimdi mindetti túrde konfıskatsııalaý qarastyrylǵan. Jaza túrin túpkilikti sot sheshedi.
Aıta keteıik, budan buryn Shymkentte oqýshyny urǵan muǵalim qamaýǵa alynǵanyn jazǵan bolatynbyz.