Shymkentte polıtsııa qyzmetkeri moped júrgizýshisine tas laqtyrǵan

ShYMKENT. KAZINFORM — Oqıǵa Turan shaǵyn aýdanynda boldy. Moped júrgizýshisin qýǵan tártip saqshysynyń áreketi beınejazbaǵa túsip qalǵan.

Atalǵan vıdeo áleýmettik jelide tarap ketti. Beıne kadrda jas jigittiń polıtsııa qyzmetkerleriniń toqtaý talabyna baǵynbaı, jaıaý júrginshiler aımaǵymen manevr jasap qashyp bara jatqany kórinedi. Polıtseıler ony jaıaý qýyp jetýge tyrysqan. Degenmen, polıtseıdiń biri quqyq buzýshyny qýyp jete almaǵan soń, onyń baǵytynda tas laqtyrǵan. Bul sát qoǵamda keń rezonans týdyrdy. Beınejazba bir mıllıonnan astam qaralym jınady.
Oqıǵaǵa baılanysty Shymkent qalalyq polıtsııa departamentiniń baspasóz qyzmeti pikir bildirdi.

— Moped júrgizýshisi jol qozǵalysy erejelerin buzyp, polıtseıdiń zańdy talabyna baǵynbaı, jasyrynýǵa tyrysqan. Ol jol qozǵalysyna qatysýshylardyń qaýipsizdigine qater tóndirdi. Atalǵan azamat ustalyp, jaýapkershilikke tartyldy. Al polıtsııa qyzmetkeriniń áreketi belgilengen ádep normalaryna saı kelmeıdi. Osyǵan baılanysty onyń ústinen qyzmettik tergeý taǵaıyndaldy, — delingen aqparatta.

Aıta keteıik, budan buryn Shymkent kóshelerindegi jarnama ekranynda ádepsiz jazba paıda bolǵanyn jazǵan bolatynbyz.