Shymkentte EAEO elderi saýda-ekonomıkalyq qatynastardy damytýǵa kelisti
ShYMKENT. KAZINFORM – Shymkentte Qazaqstan Respýblıkasynyń Premer-mınıstri Oljas Bektenovtiń tóraǵalyǵymen Eýrazııalyq úkimetaralyq keńestiń shaǵyn formattaǵy otyrysy ótti. Bul týraly Úkimettiń baspasóz qyzmeti habarlady.
Oǵan Belarýs Respýblıkasynyń Premer-mınıstri Aleksandr Týrchın, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev, Reseı Federatsııasy Úkimetiniń tóraǵasy Mıhaıl Mıshýstın, Armenııa Respýblıkasynyń vıtse-premeri Mger Grıgorıan, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev qatysty.
– Bıyl Qazaqstan Eýrazııalyq ekonomıkalyq odaq organdarynda tóraǵalyq etedi. EAEO-ǵa múshe memleketter basshylaryna úndeýinde Qazaqstan Prezıdenti Qasym-Jomart Kemeluly Toqaev bizdiń tóraǵalyǵymyzdyń negizgi basymdyqtary – jasandy ıntellektini ekonomıkalyq ıntegratsııany damytýdyń, kedergisiz ortany qalyptastyrýdyń jáne saýda geografııasyn keńeıtýdiń jańa quraly retinde paıdalaný ekenin atap ótti. Biz birlesken kúsh-jigerimizben ıntegratsııalyq úderisterge qosymsha serpin bere alatynymyzǵa senimdimin, - dep atap ótti Oljas Bektenov.
Otyrys barysynda qatysýshylar saýda-ekonomıkalyq qatynastardy odan ári damytý, tsıfrlyq tehnologııalar men jasandy ıntellekt salasyndaǵy ózara is-qımyl máseleleri boıynsha pikir almasty. Jıyn «Indýstrııa 5.0: Ózara is-qımyl kúshi» taqyrybyna arnalǵan Digital Qazaqstan 2026 halyqaralyq tsıfrlyq forýmynyń qarsańynda ótkizilip otyrǵanyn atap ótken jón, bul da kópjaqty dıalogty tereńdetýge yqpal etedi.
Qazaqstan Prezıdenti Qasym-Jomart Toqaevtyń EAEO sheńberinde jasandy ıntellektini jaýapkershilikpen damytý týraly bastamasyna, sondaı-aq elder ekonomıkasyn odan ári damytý jáne jalpy alǵanda salalardyń tıimdiligin arttyrý perspektıvalaryna nazar aýdaryldy. JI tehnologııalary logıstıkalyq protsesterdi jedeldetýge, ashyqtyqty arttyrýǵa jáne anaǵurlym tıimdi tsıfrlyq jetkizý tizbegin qalyptastyrýǵa múmkindik beretini atap ótildi.
Eske sala keteıik, buǵan deıin Oljas Bektenovtiń Túrkistan oblysynda «Móldir bulaq» aktsııasyna qatysqanyn jazǵan edik.