Shymkentte drondar ushyrýǵa ýaqytsha shekteý qoıyldy

ShYMKENT. KAZINFORM – Shymkentte iri halyqaralyq shara kezinde drondardy paıdalanýǵa qatań shekteý engizildi. Bul shara qaýipsizdikti qamtamasyz etý maqsatynda qabyldandy.

26-27 naýryzda qalada Eýrazııalyq úkimetaralyq keńes delegatsııalary men Digital Qazaqstan – 2026 forýmynyń qatysýshylary bolady. Osy kezeńde arnaıy ruqsatsyz drondardy ushyrýǵa jáne paıdalanýǵa tyıym salynady.

– Bul shekteý drondardy ushyrýǵa, basqarýǵa jáne paıdalanýǵa qatysty, – dep habarlady Shymkent qalasy ishki saıasat basqarmasynyń Óńirlik kommýnıkatsııalar qyzmeti.

Vedomstvo atap ótkendeı, erejeni buzǵandar ákimshilik jaýapkershilikke tartylady.

– Ruqsatsyz dron ushyrý áýe keńistigin paıdalaný erejesin buzady jáne ákimshilik jaýapkershilikke ákeledi, – dep naqtylady basqarma.

Erejeni buzǵandar úshin aıyppul qarastyrylǵan. Jeke tulǵalar úshin aıyppul kólemi – 10 AEK, al laýazymdy tulǵalarǵa – 20 AEK. Qaıtalanǵan jaǵdaılarda aıyppul kólemi jeke tulǵalar úshin 15 AEK-ge, laýazymdy tulǵalar úshin 25 AEK-ge deıin artady. Keıbir jaǵdaılarda dron tárkilenýi múmkin.

Qala turǵyndary men qonaqtarynan engizilgen sharalardy eskerip, drondardy paıdalanyp túsirilim jasamaýlary suralady. Shekteýler halyqaralyq delegatsııalar qatysatyn sharalar kezinde qaýipsizdikti qamtamasyz etý maqsatynda engizildi.

Buǵan deıin Shymkentte atalǵan kúnderi birqatar jolda kólik qozǵalysy shekteletinin jazǵan edik.