Shymkentte bir kósheniń boıyndaǵy 4 úıden esirtki tabyldy

Shymkentte bir kósheniń boıyndaǵy 4 úıden esirtki tabyldy, dep habarlaıdy Kazinform. 

Shymkenttik polıtseıler júrgizgen jedel sharalar barysynda esirtki qylmysyna qatysy bar degen kúdikpen «Qyzyljar» shaǵyn aýdanynyń turǵyndary ustaldy. 47 jastaǵy qala turǵynynyń úıinen bir qap apıyn men keptirilgen marıhýana tabyldy. Ekinshi kúdiktiniń úıinen quramynda esirtkisi bar ósimdiktiń tuqymdary men atys qarýy tárkilendi.

Taǵy bir jergilikti turǵynnyń 5 keli marıhýana saqtaǵany anyqtalsa, 38 jastaǵy er adamnan esirtki shóbimen toltyrylǵan 32 sirińke qoraby alyndy.

«Anyqtalǵan jaıt boıynsha tergeý amaldary júrgizilip jatyr. Quqyq qorǵaý organdary esirtkige qatysty kez kelgen zańsyz áreket qylmystyq jaýapkershilikke ákep soǵatynyn eskertedi», - delingen Shymkent qalasy Polıtsııa departamentiniń baspasóz qyzmeti taratqan aqparatta.